PPI News Bulletins 1700 پی پی آئی نیوز بلیٹن

چیف آف آرمی اسٹاف جنرل اشفاق پرویز کیانی نے وزیراعظم یوسف رضا گیلانی سے ملاقات کی ہے جس میں ملک اور خطے کی سیکیورٹی کی مجموعی صورتحال پر تبادلہ خیال کیا گیا۔وزیراعظم ہاوس میں ہونے والی اس ملاقات میں دفاع سے متعلق پیشہ وارانہ امور بھی زیر غور آئے۔ ذرائع کے مطابق وزیراعظم اور آرمی چیف کی ملاقات میں نئے ڈی جی آئی ایس آئی کی تقرری پر تبادلہ خیال کیا گیا اور اس کے لیے لیفٹیننٹ جنرل ظہیر الاسلام، لیفٹیننٹ جنرل راشد محمود،اور لیفٹیننٹ جنرل وحید ارشد کے ناموں پر غور کیا گیا۔ ذرائع کا یہ بھی کہنا ہے کہ موجودہ ڈی جی آئی ایس آئی احمد شجاع پاشا کو مدت ملازمت میں توسیع دینے کے آپشن پر بھی تبادلہ خیال کیا گیا۔

قومی اسمبلی میں اپوزیشن لیڈر چوہدری نثار علی خان نے کہا ہے کہ حکومت کا ایک ایک منٹ عوام پر بھاری ہے، مسلم لیگ ن ستمبر اکتوبر میں انتخابات کرانے کیلئے دباﺅ بڑھائے گی۔لاہور میں میڈیا سے بات چیت میں چوہدری نثار نے کہا کہ حکومت پر عوامی دباﺅ نہ بڑھایا گیا تو سال کے آخر تک بھی الیکشن ہوتے نظر نہیں آتے۔ انھوں نے کہا کہ الیکشن میں کوئی رکاوٹ نہیں ڈال سکتا، یہ ہر شخص کا آئینی حق ہے۔ بیسویں آئینی ترمیم پر ان کا کہنا تھا کہ اگر حکومت کی جانب سے اپوزیشن کے مطالبات کو تسلیم کرنا مک مکا ہے تو اپوزیشن ایسا کرتی رہے گی۔

پنجاب اسمبلی میں بنکوں کو تجارت اور زراعت کے لیے کم ازکم پچاس فیصد قرضے دینے کا پابند بنانے سمیت مفادعامہ کی دوقراردادیں منظور کرلی گئیں جبکہ دو کو مسترد کر دیا گیا۔ پنجاب اسمبلی کے اجلاس کے دوران رکن ضیاءاللہ شاہ نے قبرستانوں کے اردگرد چاردیواری کھڑی کرنے کے ساتھ جادوٹونے اورکفن چوری کے واقعات کے تدارک پر قرارداد پیش کی، جسے منظور کر لیا گیا۔حکومتی رکن شیخ علاوی الدین نے قراردادپیش کی کہ تمام بنکوں کوصنعت،تجارت اورزراعت کیلئے 50فیصد قرضہ دینے کاپابند کیاجائے ،اس قرارداد کوبھی منظورکرلیاگیا۔بعدازاں کورم کی نشاندہی پر پنجاب اسمبلی کااجلاس کل صبح دس بجے تک کیلئے ملتوی کر دیا گیا۔

ملک میں بجلی کا شارٹ فال پانچ ہزار میگاواٹ پر برقرار ہے جس کے باعث شہروں میں آٹھ گھنٹے ، دیہات میں دس گھنٹے اورصنعتی سیکٹر میں لوڈ شیڈنگ چھ گھنٹے تک جاپہنچی ہے ۔ اطلاعات کی مطابق حالیہ لوڈ شیڈنگ کی بنیادی وجہ تیل وگیس کی فراہمی میں کمی ہے جس کے باعث چند روز قبل بجلی کا شارٹ فال ساڑھے سات ہزار میگا واٹ تک چلا گیا تھا۔سردیوں میں بجلی کی مانگ میں کمی ہوجاتی ہے جس کی بناءپر پیپکو کے لیے بجلی کی عوامی طلب پوری کرنا مشکل نہیں ہوتا تاہم اس بار سردیوں میں بھی بجلی کی لوڈ شیڈنگ اپنے عروج پر ہے ۔صارفین کا کہنا ہے کہ ٹیرف میں اضافے کے باوجود حکومت شارٹ فال کمی نہیں کرسکی بلکہ اس میں اضافہ ہوگیا ہے اورحکومت کے تمام تر دعوں کے برعکس ملک بھر میں بجلی کا بحران شدت سے موجود ہے ۔

کوہستا ن میں نامعلوم افراد کی فائرنگ سے 18افراد کی ہلاکت کے بعد بڑھتی ہوئی کشیدگی کے پیش نظر حکومت نے گلگت میں تین روزہ سوگ کا اعلان کرتے ہوئے دفعہ 144نافذ کردی ہے۔پابندی کے باعث تمام سرکاری ونجی دفاتراور تعلیمی ادارے تین دن کے لیے بند رہیں گے۔ گلگت میں ان ہلاکتوں کے بعد عوام کی جانب سے سخت رد عمل سامنے آرہا ہے اورامن کے خطر ے کے پیش نظر حکومت نے یہ اعلان کیا ہے۔ دوسری جانب گلگت کے مضافات میں مسلسل احتجاج اور روڈ بلاک کیے جانے کی اطلاعات موصول ہورہی ہیں۔ وزیراعلیٰ گلگت بلتستان مہدی شاہ نے عوام سے پرامن رہنے کی اپیل کی ہے ۔

مشیر پیٹرولیم ڈاکٹر عاصم حسین نے کہا ہے کہ آئندہ سال سے پاکستان کو ایل این جی کی سپلائی شروع ہوجائیگی۔اسلام آباد میںمےڈ ےا سے بات کرتے ہوئے ان کا کہنا تھا کہ قطر ایل این جی کے ٹرمینل کا تکنیکی جائزہ لینے کے لیے رضا مند ہوگیا ہے جس کے بعد آئندہ سال سے پاکستان کو ایل این جی ملنے کی توقع ہے۔ انہوں نے بتایا کہ قطر سے پندہ اور سولہ ڈالر فی ایم ایم بی ٹی یو پر بات چیت ہوسکتی ہے جبکہ قطر نے پاکستان کو 35لاکھ ٹن ایل این جی فراہم کرنے کی پیش کش کی ہے ۔

سہ ملکی سیریز میں بھارت نے سری لنکا کو ہرا کر فائنل میں پہنچنے کی امیدیں برقرار رکھی ہیں. ویرات کوہلی کی طوفانی اننگز کے باعث بھارت نے سری لنکا کی طرف سے دیا گیا 321 رنز کا ہدف 37 ویں اوورز میں پورا کرلیا.ہوبارٹ میں جاری سیریز کے میچ میں بھارت نے ٹاس جیت کر فیلڈنگ کا فیصلہ کیا۔ تلکا رتنے دلشان اور سنگا کارا کے درمیان دوسری وکٹ پر 200 رنز کی پارٹنرشپ کے باعث سری لنکا نے چار وکٹ کے نقصان پر320 رنز بنائے۔ دلشان ایک سو ساٹھ کے سکور پرناقابل شکست رہے۔ سنگا کارا نے ایک سو پانچ رنز جوڑے۔ جواب میں بھارت نے شروع سے طوفانی انداز اپنائے رکھا اور سہواگ , ٹنڈولکر , گھمبےراور ویرات کوہلی نے شاندار بیٹنگ کی اور صرف 37 ویں اوور میں ہی ہدف حاصل کرلیا. بھارت کے لیے یہ فتح بونس پوائنٹ کے ساتھ انتہائی ضروری تھی، اب اگر سری لنکا کو آسٹریلیا سے شکست ہوگئی تو بھارت فائنل میں پہنچ جائے گا۔