PPI NEWS Bulletin 2100 پی پی آئی نیو ز بلیٹن

ہیڈلائنز:۔

قومی سلامتی کمیٹی کی سفارشات پر غور کیلئے کابینہ کی دفاعی کمیٹی کا اجلاس
اسامہ بن لادن کے اہلخانہ کی ملک بدری تاخیر کا شکار
پاکستان کا امریکہ کو بنوں جیل سے فرار ہونیوالوں کی فہرست دینے سے انکار
وزارت پانی و بجلی کا لوڈشیڈنگ آئندہ چھ ماہ تک جاری رکھنے کا انتباہ
تاجکستان گیس پائپ لائن منصوبے پر پاکستان، افغانستان اور بھارت کے مذاکرات بے نتیجہ ختم
اور
پاک بنگلہ دیش سیریز کیلئے قومی ٹیم کا اعلان جمعرات کو متوقع

خبروں کی تفصیلا ت:۔

وزیراعظم یوسف رضا گیلانی کی زیرصدارت کابینہ کی دفاعی کمیٹی کا اجلاس اسلام آباد میں جاری ہے، جس میں قومی سلامتی کمیٹی کی سفارشات اور نیٹو سپلائی کی بحالی کے امور کا جائزہ لیا جارہا ہے۔اجلاس میں پارلیمنٹ کے مشترکہ اجلاس سے پاس ہونے والی متفقہ قرار داد پر عملدرآمد کا بھی جائزہ لیا جائے گا۔اجلاس میں چیف آف آرمی اسٹاف جنرل اشفاق پرویز کیانی، چیئرمین جوائنٹ چیفس آف سٹاف کمیٹی جنرل خالد شمیم وائیں، چیف آف نیول اسٹاف ایڈمرل آصف سندیلہ اور چیف آف ائیر سٹاف طاہر رفیق بٹ سمیت وفاقی وزراءشریک ہیں۔

اسامہ بن لادن کے اہلخانہ کی ملک بدری تاخیر کا شکار ہوگئی۔ وفاقی وزیر داخلہ رحمن ملک نے اسلام آباد میں میڈیا سے بات چیت کے دوران بتایا کہ وزارت داخلہ نے اسامہ بن لادن کی پاکستان سے روانگی کے حوالے سے یمن، سعودی عرب اور سوڈان کے سفارتحانوں کو خطوط ارسال کئے ہیں۔ انھوں نے کہا کہ متعلہ حکومتوں سے گرین سگنل ملنے تک اسامہ کے اہلخانہ کو روانہ نہیں کیا جاسکتا۔واضح رہے کہ اسامہ بن لادن کے اہل خانہ کی 45 دن کی سزا آج ختم ہورہی ہے، جس کے بعد کہا جارہا تھا کہ انہیں آج کسی بھی وقت ملک بدرکردیا جائے گا۔

پاکستان نے امریکہ کو بنوں جیل میں حملے کے بعد فرار ہونے والے قیدیوں کی فہرست دینے سے انکار کردیا۔ اس حوالے سے امریکی تحقیقاتی ٹیم نے آج پشاور پہنچ کر بنوں حملے کے بعد فرار ہونے والے قیدیوں کی فہرست حاصل کرنے کی کوشش کی، تاہم خیبرپختونخواہ حکومت نے فہرست دینے سے انکار کردیا، جس کے بعد امریکی ٹیم اسلام آباد واپس لوٹ گئی۔خیال رہے کہ چار سو کے قریب قیدی بنوں جیل پر طالبان کے حملے کے بعد فرار ہوگئے تھے، جس میں سے سو کے قریب افراد نے دوبارہ خود کو پولیس کے حوالے کر دیا ہے۔

وزارت پانی و بجلی نے آئندہ چھ ماہ میں بھی بجلی لوڈ شیڈنگ جاری رہنے کی نوید سنا دی۔ اسلام آباد میں قومی اسمبلی کی قائمہ کمیٹی برائے پانی و بجلی کے اجلاس میں وزارت پانی و بجلی کے حکام نے بتایا کہ اپریل تا ستمبر بجلی کا شارٹ فال چار ہزار ایک سو انیس میگاواٹ برقرار رہے گا، جسکے باعث لوڈشیڈنگ بھی جاری رہے گی۔سیکرٹری پانی و بجلی امتیاز قاضی نے اجلاس کو بتایا کہ بھارت کے نجی شعبہ نے پاکستان کو بجلی دینے میں دلچسپی ظاہر کی ہے،اس حوالے سے سمری کابینہ کو بھجوا دی گئی ہے۔ انہوں نے کہا کہ آٹھ بجے مارکیٹیں بند کرنے سے یومیہ بارہ سو میگاواٹ بجلی بچت ہو سکتی ہے، تاہم توانائی کانفرنس کے زیادہ تر فیصلوں پر وزیراعلٰی پنجاب نے عملدرآمد روک رکھا ہے۔

تاجکستان سے ملنے والی گیس کیلئے پاکستان، بھارت اور افغانستان کے مذاکرات بے نتیجہ ختم ہوگئے۔تینوں ممالک کے نمائندگان کے درمیان اسلام آباد میں مذاکرات ہوئے، جس کے بعد سیکرٹری پٹرولیم اعجاز چودھری نے صحافیوں کو بتایا کہ افغانستان اور بھارت کے درمیان گیس کی ٹرانزٹ فیس پر معاملہ طے نہیں ہوسکا، اور بھارتی حکام نے فیس میں مزید کمی کیلئے معاملہ التواءمیں ڈال دیا ہے۔

پاکستان اور بنگلادیش کے درمیان واحدون ڈے اور ٹی ٹوئنٹی میچ کیلئے ٹیم کا انتخاب جمعرات کو متوقع ہے۔چیف سلیکٹر اقبال قاسم کے مطابق پاکستان بنگلادیش کے درمیان واحد ون ڈے اور ٹی ٹوئنٹی کیلئے ٹیم کا انتخاب دو سے تین دن میں ہوسکتا ہے۔ان کا کہنا تھا کہ جمعرات کو سلیکشن کمیٹی کا اجلاس مشاورت کیلئے طلب کیا جائیگا۔ جس کے بعد ٹیم کا اعلان جمعرات کو ہی کیا جاسکتا ہے۔اقبال قاسم نے بنگلادیشی ٹیم کی ملک میں آمد کو خوش آئند قرار دیا اور کہا کہ پاکستان اور بنگلادیش کے درمیان میچز سے ملک میں عالمی کرکٹ بحال ہوجائیگی۔