PPI NEWS Bulletin 2000پی پی آئی نیوزنیوزبلیٹن

ہیڈلائنز:۔

سندھ حکومت کا ایک بار پھر اسکائپ اور دیگر اپلیکشنز پر پابندی کا فیصلہ۔
عدالت میں پیشی، پولیس نے پرویز مشرف کو سیکیورٹی فراہم کرنے سے معذرت کرلی۔
پارلیمنٹ کو بھی بنیادی انسانی حقوق کی پامالی کا اختیار نہیں، چیف جسٹس پشاور ہائیکورٹ۔
جماعت الدعوة نے کا عبدالقادر ملا کی پھانسی کے خلاف احتجاج کا اعلان۔
سلمان خان نمبرون جبکہ شاہ رخ دلفریب شخصیت کے مالک ہیں، عامر خان۔
اور
ملک کے بیشتر علاقوں میں موسم خشک اور سرد رہنے کا امکان۔

خبروں کی تفصیل:۔

سندھ حکومت نے ایک بار پھر سیکیورٹی صورتحال بہتر بنانے کیلئے اسکائپ، واٹس ایپ اور دیگر سوشل میڈیا اپلیکشنز پر پابندی کا فیصلہ کرلیا۔ میڈیا رپورٹس کے مطابق سندھ حکومت نے سوشل میڈیا سائٹس سافٹ ویئرز پر پابندی کے فیصلے پر عملدرآمد کیلئے وفاق کو خط ارسال کردیا ہے۔اس پابندی کا فیصلہ وزیراعلیٰ سندھ سید قائم علی شاہ کی زیرصدارت ہونے والے اعلیٰ سطح کے اجلاس میں کیا گیا۔زیر اعلیٰ سندھ نے اجلاس کے دوران پولیس کو ٹارگٹ کلرز، دہشت گردوں اور دیگر جرائم پیشہ افراد کی فہرست کا ازسرنو جائزہ لینے کی ہدایت کی، اس موقع پرفیصلہ کیا گیا کہ سابق وزیراعلیٰ سندھ ارباب غلام رحیم کے دور حکومت میں پے رول پر رہا کئے گئے 470 افراد کو دوبارہ گرفتار کیا جائےگا اور ٹارگٹڈ آپریشن کے دوران حراست میں لئے گئے ٹارگٹ کلرز اور جرائم پیشہ افراد کی سیاسی وابستگیوں کو مرحلہ وار ظاہر کیا جائے گا۔اجلاس کے دوران اس بات کا بھی فیصلہ کیا گیا کہ سندھ بھر کی مختلف جیلوں میں قید خطرناک مجرموں کو ملک کے مختلف صوبوں کی جیلوں میں منتقل کیا جائے گا اور اگر کسی بھی جیل میں قید مجرم کے باہر رابطوں کا پتہ چلا تو اس جیل کے سپرینڈینٹ کے خلاف سخت کارروائی کی جائے گی۔

پولیس نے عدالت میں پیشی کے دوران سابق صدر جنرل (ر)پرویز مشرف کو فول پروف سیکیورٹی دینے سے معذرت کر لی۔اس حوالے سے پولیس رپورٹ میں کہا گیا ہے کہ پیشی کے موقع پر سابق صدر پرویز مشرف پر حملے کا خدشہ ہے اور ان کی سیکیورٹی کے حوالے سے انتظامات ممکن نہیں۔واضح رہے کہ غداری کیس میں خصوصی عدالت نے پرویز مشرف کو چوبیس دسمبر کو طلب کررکھا ہے۔

پشاور ہائیکورٹ کے چیف جسٹس دوست محمد خان نے کہا ہے کہ پارلیمنٹ کو بھی بنیادی انسانی حقوق کی پامالی کا اختیار نہیں، بعض لوگ انسانی حقوق کی فراہمی سے روکنا چاہتے ہیں ، ججز اس پر خاموش نہیں رہیں گے۔چیف جسٹس پشاور ہائیکورٹ دوست محمد خان پشاور میں جوڈیشل اکیڈمی میں تربیت حاصل کرنے والے سول ججز اور دیگر عدالتی عملے کی تقریب تقسیم اسناد سے خطاب کر رہے تھے۔ جسٹس دوست محمد کا کہنا تھا کہ عدلیہ ملازم سے لے کر ان تک کسی کی بھی کرپشن برداشت نہیں کرے گی ، ملک کا مقدر قانون کی حکمرانی سے وابستہ ہے۔ انکا کہنا تھا کہ خیبر پختونخوا میں انسانی حقوق کی پامالی ہو رہی ہے، رہائشی علاقوں میں مسلح گروہوں، جرائم پیشہ افراد کی وارداتیں غربت اور تعلیم کی کمی کے باعث ہو رہی ہیں۔

جماعت الدعوة نے کا عبدالقادر ملا کی پھانسی کے خلاف سولہ دسمبر کو یوم احتجاج کا اعلان کر دیا۔ حافظ سعید کہتے ہیں پاکستان سے محبت کرنے والوں کو بھارتی اشاروں پر پھانسی دی جا رہی ہے۔حافظ سعید نے کہا ہے کہ سولہ دسمبر کو ملک بھر میں مظاہرے کئے جائیں گے۔ انہوں نے مطالبہ کیا کہ حکومت عبد القادر ملا کی پھانسی کے خلاف بھرپور آواز اٹھائے اور بنگلہ دیش سے سفارتی سطح پر احتجاج کرے۔ واضح رہے بنگلہ دیش کی عدالت عالیہ نے جماعت اسلامی کے رہنمائ عبدالقدیر ملا کی پھانسی کی سزا برقرار رکھنے کا فیصلہ کیا تھا لیکن12 دسمبر کو انہیں پھانسی دیدی گئی تھی۔ جنگی جرائم کی عدالت نے انھیں عمر قید کی سزا سنائی تھی لیکن سپریم کورٹ نے حکومت کی اپیل پر اسے سزائے موت میں بدل دیا تھا۔

بالی ووڈ کے مسٹر پروفیکٹ عامر خان کا کہنا ہے کہ سلمان خان بالی ووڈ کے حقیقی نمبر ون اسٹار اور شاہ رخ نہایت دلفریب شخصیت کے مالک ہیں۔ایک انٹرویو کے دوران مسٹر پرفیکٹ کا کہنا تھا کہ ان کے دل میں سلمان خان کے لئے ہمیشہ پیار رہتا ہے۔ انہیں یہ بات کہنے میں کوئی عار نہیں کہ وہی نمبر ون اسٹار اور بالی ووڈ میں مجھ سے زیادہ مقبول ہے کیونکہ سلمان خان میں اکیلے ہی کسی بھی فلم کو کامیاب کرنے کی وہ صلاحیت ہے جو ان میں نہیں۔عامر خان کا کہنا تھاکہ شاہ رخ خان بھی ایک بہترین اداکار اور دلفریب شخصیت کے مالک ہیں، انہیں شاہ رخ کو اسکرین پر دیکھنا بہت اچھا لگتا ہے اور جب بھی وہ انہیں دیکھتے ہیں ان کے چہرے پر مسکراہٹ آجاتی ہے۔ انہوں نے کہاکہ انہیں شاہ رخ کی فلم ”دل والے دلہنیا لے جائیں گے“ اور ”کچھ کچھ ہوتاہے“ بہت پسند ہے۔

محکمہ موسمیات نے آئندہ چوبیس گھنٹوں کے دوران ملک کے بیشتر علاقوں میں موسم خشک اور سرد رہنے کی پیشگوئی کی ہے، تاہم پنجاب کے میدانی علاقوں میں آئندہ چند روز کے دوران صبح کے وقت شدید دھند چھائے رہنے کا امکان ہے۔ملک کے چند شہروں میںآج درجہ حرارت کچھ اسطرح رہا۔ اسلام آباد26 اور05، لاہور24 اور07 ، کراچی30 اور15، پشاور28 اور07، کوئٹہ20 اورمنفی 06، مظفرآباد21 اور04، فیصل آباد27 اور07، ملتان25 اور 08جبکہ ڈیرہ اسمعیل خان میں زیادہ سے زیادہ 23 اور کم سے کم 10 ڈگری سینٹی گریڈ ریکارڈ کیے گیے۔