PPI NEWS Bulletin 1900 پی پی آئی نیوز بلیٹں

ہیڈلائنز:۔

وفاقی حکومت کا بلوچستان کے حالات بہتر بنانے کیلئے سخت اقدامات کا فیصلہ
حکمران آئین سے متصادم ترامیم لارہے ہیں، عمران خان
نیٹو سپلائی کی بحالی ،دفاع پاکستان کونسل نے احتجاج کے دوسرے مرحلے کی منصوبہ بندی مکمل کرلی
کراچی میں فائرنگ اور پرتشدد واقعات آج مزید دو افراد جاں بحق، نو زخمی
امریکہ نے ایران پر نئی پابندیاں عائد کردیں
اور
ملک میں پہلی بار ٹائٹ گیس کے ذخائر دریافت
Stock Exchange

خبروں کی تفصیل:۔

وفاقی حکومت نے بلوچستان میں امن و امان کی صورتحال بہتر بنانے کیلئے سخت اقدامات کرنے کا فیصلہ کرلیا۔ اس سلسلے میں وزیراعظم راجہ پرویزاشرف کی زیرصدارت امن وامان سے متعلق اجلاس کوئٹہ میں ہوا۔اجلاس میں بلوچستان میں غیرقانونی گاڑیوں اوراسلحہ راہداریوں کو منسوخ کرنیکا فیصلہ کیا گیا۔ اجلاس کے دوران سیکیورٹی حکام نے امن و امان کی صورتحال پر بریفننگ دی۔ اس سے قبل بلوچستان کابینہ کے اجلاس سے خطاب کرتے ہوئے وزیر اعظم راجہ پرویز اشرف نے بلوچستان سے زیادتیوں پر بلوچ عوام سے معافی مانگی۔وزیر اعظم نے کہا کہ ہم ہر حال میں بلوچستان میں امن و امان یقینی بنائیں گے۔

پاکستان تحریک انصاف کے سربراہ عمران خان نے کہا ہے کہ حکمران آئین سے متصادم ترامیم لارہے ہیں۔اسلام آباد میں میڈیا سے بات چیت کرتے ہوئے عمران خان نے کہا کہ صدر زرداری کی لوٹی ہوئی دولت بچانے کیلئے عدلیہ کو تباہ کیا جارہا ہے۔ انھوں نے کہا کہ ملک میں تبدیلی صرف تحریک انصاف ہی لاسکتی ہے، سیاسی مگرمچھ ملکر بھی سونامی کو نہیں روک سکتے۔عمران خان کا کہنا تھا کہ مسلم لیگ ن اگر اسمبلیوں سے باہر نکل جائیں تو ساٹھ دن میں انتخابات ہوسکتے ہیں۔

دفاع پاکستان کونسل نے نیٹو سپلائی بحالی کے خلاف احتجاج کے دوسرے مرحلے کی منصوبہ بندی مکمل کر لی۔ کراچی سے لے کر طورخم تک نیٹو سپلائی کو مختلف جگہوں پر روکا جائے گا۔نیٹو سپلائی کی بحالی کے خلاف دفاع پاکستان کونسل کے احتجاج کا دوسرا مرحلہ کل سے شروع ہوگا۔ دوسرے مرحلے میں جماعت اسلامی کل پشاور سے طورخم تک مارچ کرے گی، جبکہ دفاع پاکستان کونسل 14 اور 15 جولائی کو کوئٹہ سے چمن تک اور سولہ جولائی کو پشاور سے طورخم تک مارچ کرے گی۔دفاع پاکستان کونسل کی منصوبہ بندی کے مطابق کراچی سے لے کر طورخم تک نیٹو سپلائی کو مختلف جگہوں پر روکا جائے گا۔

کراچی میں آج فائرنگ اور پرتشدد واقعات میں خاتون سمیت دو افراد جاں بحق اورنو زخمی ہوگئے۔ پولیس حکا م کے مطابق ملیر کینٹ کی دیوار کے قریب سے پینتیس سالہ خاتون کی لاش برآمد ہوئی، جسے اغوا کے بعد تشدد کرکے قتل کیا گیا تھا۔کلفٹن کے علاقے نیلم کالونی میں ایک شخص کو قتل کردیا گیا۔ اسی طرح بلدیہ ٹاون ،اورنگی ٹاو¿ن ، شاہراہ فیصل ، ملیر کھوکھرا پار، گارڈن اورلیاری میں فائرنگ کے مختلف واقعات میں نو افراد زخمی ہوگئے۔

امریکہ نے ایران پر مزید نئی پابندیاں عائد کر دی ہیں۔امریکی وزراتِ خزانہ کے مطابق اس نے ایسی متعدد کمپنیوں کو بلیک لسٹ کر دیا ہے جس کے بارے میں یقین ہے کہ وہ ایران کو جوہری ہتھیاوں کے حصول میں مدد فراہم کر رہی تھیں۔
امریکی وزارتِ خزانہ کے مطابق ہم ایران پر دباو¿ بڑھاتے رہے گے۔

پاکستان کی تاریخ میں پہلی بار ملک میں ٹائٹ گیس کے ذخائر دریافت کرلئے گئے۔ وزارت پیٹرولیم کے مطابق ماڑی گیس اور او ایم وی نے کھترو بلاک میں ٹائٹ گیس کے ذخائر دریافت کئے ہیں۔ وزارت پیٹرولیم کا کہنا ہے کہ ٹائٹ گیس کی دریافت سے ملک میں توانائی کے بحران پر قابو پانے میں مدد ملے گی۔

کراچی اسٹاک ایکس چینج میںآ ج مندی کا رجحان دیکھا گیا اور کے ایس ای100انڈکس69پوائنٹس کمی سے14ہزار332پوائنٹس پر بند ہوا ۔مجموعی طور پر9کروڑسے زائد شیئر ز ٹریڈ ہوئے۔ دوسری جانب اسلام آباد اسٹاک ایکسچےنج میں بھی منفی رجحان دیکھا گیا، اور آئی ایس ای10انڈ یکس 9 پوائنٹس کمی سے 2877 پوائنٹس پر بند ہوا۔مارکیٹ میں مجموعی طور پر آج22ہزارسے زائد شیئرز ٹریڈ ہوئے۔