PPI NEWS Bulletin 1900پی پی آئی نیوزنیوزبلیٹن

ہیڈلائنز:۔

پاکستان افغانستان میں عدم مداخلت کی پالیسی پر عمل پیرا ہے، سرتاج عزیز۔
مہنگائی کیخلاف احتجاج، بلاول بھٹو نے تحریک انصاف کی حمایت کردی۔
کراچی میں فائرنگ اور پرتشدد واقعات میں چار افراد جاں بحق۔
پنجاب میں بلدیاتی انتخابات کیلئے نامزدگی فارموں کی چھپائی جاری۔
سندھ اور پنجاب میں چینی کی قیمتوں میں کمی کا امکان۔
اور
انڈر نائنٹین کرکٹ ورلڈ کپ کے شیڈول کا اعلان۔

خبروں کی تفصیل:۔

وزیراعظم کے مشیر برائے امور خارجہ سرتاج عزیز نے کہا ہے کہ پاکستان افغانستان میں عدم مداخلت کی پالیسی پر عمل پیرا ہے، خواہش ہے کہ دیگر ممالک بھی افغانستان میں مداخلت نہ کریں۔اسلام آباد میں میڈیا سے بات چیت کے دوران سرتاج عزیز نے کہا کہ افغانستان میں کسی قسم کی مداخلت نہ کرنیکا عزم کررکھا ہے، پرامن افغانستان پرامن پاکستان کیلئے ضروری ہے۔ انھوں نے کہا کہ بنگلہ دیش میں عبدالقادر ملا کو پاکستان کی حمایت پر پھانسی دی گئی، بنگلہ دیشی ٹربیونل پر عالمی اداروں بھی تشویش کا اظہار کیا ہے۔

پیپلز پارٹی کے چیئرمین بلاول بھٹو نے مہنگائی کے خلاف 22 دسمبر کو تحریک انصاف کے مظاہرے کی حمایت کر دی ہے۔ آصفہ بھٹو زرداری نے ٹویٹر پر عمران خان کی پولیو کے خلاف مہم کی حمایت کی ہے۔ٹویئٹر پر اپنے پیغام میں بلاول بھٹو نے کہا ہے کہ وہ مہنگائی کے خلاف تحریک انصاف کے مظاہرے کی حمایت کرتے ہیں اور یہ تحریک انصاف کا ایسا اقدام ہے جس کی حمایت کی جا سکتی ہے۔ بلاول بھٹو کا کہنا تھا کہ اتنی مہنگائی پیپلز پارٹی کے پانچ سالہ دور میں نہیں ہوئی جتنی نون لیگ کی چھے ماہ کی حکومت میں ہو گئی ہے، عام آدمی کی زندگی بے پناہ مشکل بنا دی گئی ہے۔ دوسری جانب آصفہ بھٹو زرداری نے ٹویٹر پر عمران خان کی پولیو کے خلاف مہم کی حمائت کی ہے۔ انکا کہنا ہے کہ جہاں صحت عامہ کے معاملات کی بات ہو سب کو اختلافات بھول کر اسکی حمائت کرنا چاہئیے۔

کراچی میں فائرنگ اور پرتشدد واقعات میں خاتون اور طالبہ سمیت چار افراد جاں بحق ہوگئے،قانون نافذ کرنے والے اداروں نے پچاس سے زائد ملزمان کو گرفتار کرنے کا دعویٰ کیا ہے۔تفصیلات کے مطابق لانڈھی ریڑھی گوٹھ میں مکان سے ایک خاتون کی تشدد زدہ لاش برآمد ہوئی،شاہ فیصل ندی سے ایک شخص کی تشدد زدہ لاش ملی۔ نیو کراچی سے ایک شخص کی لاش برآمد ہوئی جسے تشدد کرکے قتل کیا گیا، گلستان جوہر بلاک بارہ میں نامعلوم موٹر سائیکل سواروں کی فائرنگ سے سولہ سالہ ماہم اپنی زندگی سے ہاتھ دھو بیٹھی جبکہ باپ فائرنگ سے زخمی ہوگیا۔دوسری جانب رینجرز نے لیاری،نارتھ ناظم آباد،شاہ فیصل سمیت شہر کے چودہ مختلف مقامات پر چھاپے مار کر انیس ملزمان کو گرفتار کرلیا۔ ایسٹ زون پولیس نے چودہ ملزمان کو گرفتار کیا تو ویسٹ زون میں ٹارگٹ کلر سمیت اٹھائس ملزمان گرفتار ہوئے۔

پنجاب میں بلدیاتی انتخابات کے لیے نامزدگی فارم کی چھپائی کا عمل جاری ہے۔دیگر صوبوں کی طرح پنجاب میں بھی بلدیاتی انتخابات کی تیاریاں تیزی سے جاری ہیں اور اگلے دو روز تک بلدیاتی امیدواروں کیلئے کاغذات نامزدگی کی چھپائی کا کام مکمل کر لیا جائے گا۔ الیکشن کمیشن ذرائع کے مطابق جن امیدواروں نے پرانے شیڈول کے مطابق کاغذات نامزدگی داخل کروائے تھے ان سے فیس نہیں لی جائے گی تاہم نیا نامزدگی فارم جمع کروانا ہوگا۔ الیکشن کمیشن آف پاکستان نے پنجاب میں بلدیاتی انتخابات کیلئے پینتالیس لاکھ کاغذات نامزدگی کی چھپائی کاکام شروع کرادیا ہے، کاغذات نامزدگی فارم میں ختم نبوت کا خانہ بھی شامل کیا گیا ہے۔

ماہ دسمبر کے دوران سندھ اور پنجاپ میں چینی کی ہول سیل قیمتون میں 8روپے فی کلو گرام تک کم ہو سکتی ہیں جبکہ ریٹیل سطح پر بھی چینی کی فی کلو قیمت میں کمی ہوگئی ہے۔سند ھ اور پنجاب میں کرشنگ کے آغارز کے بعد سے چینی کی قیمت میں کمی دیکھی جارہی ہے جبکہ گزشتہ 20 روز کے دوران چینی کی قیمت میں 8 روپے کلو تک کی کمی ہوئی ہے۔کمی کے بعد چینی کی ہول سیل قیمت 48 روپے کلو ہوگئی ہے جو کہ کچھ روز قبل تک 56 روپے کلو میں فروخت ہورہی تھی جبکہ ریٹیل سطح پر بھی چینی 58 سے 60 روپے کلو سے کم ہو کر 50 روپے کلو ہو چکی ہے۔

انٹرنیشنل کرکٹ کونسل نے انڈر نائنٹین کرکٹ ورلڈ کپ کے شیڈول کا اعلان کردیا۔ میگا ایونٹ چودہ فروری سے یکم مارچ تک متحدہ عرب امارات میں کھیلا جائیگا۔ پاکستان اور بھارت ایک ہی گروپ میں شامل ہیں جو پندرہ فروری کو مد مقابل آئیں گے۔دبئی میں انٹرنیشنل کرکٹ کونسل نے انڈر نائنٹن کرکٹ ورلڈ کپ کے شیڈول کا اعلان کیا ایونٹ چودہ فروری سے متحدہ عرب امارت میں شروع ہوگا جو یکم مارچ تک جاری رہے گا۔ ٹورنامنٹ میں اڑتالیس میچز سات مختلف وینیوز پر کھیلے جائیں گے۔سولہ ٹیموں کو چار گروپس میں تقسیم کیا گیا ہے۔ گروپ اے میں پاکستان، بھارت، اسکاٹ لینڈ اور پاپوا نیوگینا شامل ہیں۔ گروپ بی میں آسٹریلیا، بنگلہ دیش، افغانستان اور نمیبیا پرمشتمل ہے۔ ساو¿تھ افریقہ، ویسٹ انڈیز، زمبابوے اور کینیڈا کو گروپ سی میں رکھا گیا ہے جبکہ انگلینڈ، نیوزی لینڈ، سری لنکا اور یو اے ای گروپ ڈی کا حصہ ہیں۔ روایتی حریف پاکستان اوربھارت کے درمیان مقابلہ پندرہ فروری کو ہوگا۔