PPI NEWS Bulletin 1800 پی پی آئی نیو زبلیٹن

ہیڈلائنز:۔

نواز شریف نے امریکہ سے پاکستان سے متعلق پالیسی میں تبدیلی کا مطالبہ کردیا
وزیراعظم سے وفاقی وزیر قانون کی ملاقات، این آر او کیس پر تبادلہ خیال
تمام سیاسی جماعتیں متحد ہوکر دہشتگردی کا مقابلہ کریں، بشیر بلور
رمضان کے شروع ہوتے ہی ملک بھر میں اشیائے خورونوش چالیس فیصد تک مہنگی
شام میں گزشتہ سال سے جاری احتجاج میں ہلاکتیں انیس ہزار سے تجاوز
اور
سری لنکا کیخلاف سلو اوور ریٹ پر بھارتی ٹیم پر جرمانہ عائد

خبروں کی تفصیل:۔

مسلم لیگ ن کے صدر میاں نواز شریف نے کہا ہے کہ امریکہ پاکستان کی سالمیت اور خودمختاری کا احترام کرے۔ یہ بات انھوں نے سبکدوش امریکی سفیر کیمرون منٹر سے ملاقات کے دوران کہی۔ میاں نواز شریف نے کہا کہ امریکہ پاکستان سے متعلق اپنی پالیسیوں پر نظرثانی کرے، باہمی اعتماد اور احترام کی پالیسی سے ہی تعاون کو فروغ ملے گا۔نواز شریف کا کہنا تھا کہ ایسی پالیسی سے ہی خطے میں امن اور استحکام کا مقصد حاصل ہوسکتا ہے۔امریکی سفیر کا اس موقع پر کہنا تھا کہ پاکستان میں جمہوریت صحیح سمت پر گامزن ہے۔

وزیراعظم راجا پرویز اشرف سے وفاقی وزیر قانون فاروق ایچ نائیک نے ملاقات کی ہے۔وزیراعظم ہاﺅس اسلام آباد میں ہونیوالی ملاقات میں این آر او عملدرآمد کیس پر عدالتی حکم کے حوالے سے حکومتی ردعمل پر تبادلہ خیال کیا گیا۔ملاقات میں فاٹا میں مقامی حکومت کے نظام اور انسدادہشت گردی کے قانون کے مسودے پر بھی بات چیت کی گئی۔ وزیر قانون نے وزیراعظم کو بجلی اور گیس چوری روکنے کیلئے قانون سازی سے بھی آگاہ کیا۔

خیبر پختونخوا کے سینئر صوبائی وزیر بشیر احمد بلور نے طالبان ترجمان کے افغان سرحد سے پاکستان پر حملے جاری رکھنے کے اعلان پر اظہار افسوس کرتے ہوئے تمام سیاسی جماعتوں سے اپیل کی ہے کہ وہ متحد ہوکر دہشت گردی کا مقابلہ کریں۔ پشاور میں میڈیا سے ملاقات کے دوران سینئر صوبائی وزیر کا کہنا تھا کہ طالبان کے اس واضح بیان سے ان تمام سیاسی و مذہبی جماعتوں کی آنکھیں کھل جانی چاہئیں جو یہ کہتی رہی ہیں کہ یہ جنگ ہماری نہیں ہے۔ بشیر احمد بلور نے تحریک انصاف اور جماعت اسلامی کو تنقید کا نشانہ بناتے ہوئے الزام عائد کیا کہ دونوں جماعتیں بھی در پردہ طالبان سے ملی ہوئی ہیں۔ بشیر بلور نے کہا کہ وہ تمام سیاسی جماعتوں سے یہ اپیل کرتے ہیں کہ دہشت گردی کی جنگ پر سیاست سے گریز کریں اور سب مل کر ان دہشت گردوں کا مقابلہ کریں۔

ملک بھر میں مختلف مقامات پر سستے رمضان بازاروں کے باوجود عوام سستی اشیاءکو ترس گئے۔تفصیلات کے مطابق رمضان کے آغاز کے ساتھ ہی گراں فروشوں نے مختلف اشیاءکی قیمتوں میں چالیس فیصد تک اضافہ کردیا ہے، جبکہ پھلوں اور سبزیوں کے من مانے نرخ وصول کئے جارہے ہیں۔بڑے شہروں میں انگور کے نرخ ڈھائی سو سے بڑھکر تین سو، کیلا سو سے بڑھ کر ڈیڑھ سو روپے فی درجن، سیب درجہ دوئم ساڑھے تین سو روپے کلو، کھجور ایک سو نوے سے بڑھ کر دو سو دس روپے کلو اور سموسے بھی 96 سے بڑھکر ایک سو دس روپے فی درجن ہوگئے ہیں۔

شام میں 2011ءسے جاری خونریز احتجاج کے دوران ہلاکتوں کی تعداد انیس ہزار سے تجاوز کرگئی۔شامی ہیومن رائٹس کا کہنا ہے کہ شام میں گزشتہ برس مارچ سے صدر بشار الاسد کے خلاف احتجاج کے نتیجے میں شروع ہونی والی پرتشدد کارروائیوں میں ہلاکتوں کی تعداد 19ہزار 106 ہو گئی ہے، جن میں 13 ہزار296 عام شہری ہیں۔دوسری جانب ترکی کی وزارت خارجہ کا کہنا ہے کہ شام کا ایک اور منحرف جنرل ہفتے کی شب ترکی پہنچ گیا ہے جس کے بعد بشار الاسد کا ساتھ چھوڑ کر ترکی پہنچنے والے جنرلوں کی تعداد 25 ہو گئی ہے۔

انٹرنیشنل کرکٹ کونسل نے سری لنکا کے خلاف پہلے ون ڈے میں سلو اوور ریٹ پر بھارتی ٹیم اور کپتان پر جرمانہ عائد کردیا۔ ہمبنٹوٹا میں کھیلے گئے پہلے میچ میں بھارت نے سری لنکا کے خلاف مقررہ وقت تک ایک اوور کم کیا۔ آئی سی سی کے میچ ریفری کرس براڈ نے سلو اوور ریٹ کی پاداش میں بھارتی ٹیم کے کپتان مہندرسنگھ دھونی پر میچ فیس کا بیس فیصد جرمانہ عائد کیا۔ ٹیم کے دیگرکھلاڑی دس فیصد جرمانے کی زد میں آئے۔ بھارت نے میچ اکیس رنزسے جیت لیا تھا۔