PPI NEWS Bulletin 1500پی پی آئی نیوزنیوزبلیٹن

ہیڈلائینز:۔

عمران خان کا بائیس دسمبر کو مہنگائی کیخلاف ملک گیر احتجاج کا اعلان۔
این آئی سی ایل کیس، تحقیقات مکمل ہونے تک چیئرمین نیب کا رخصت پر رہنے کا فیصلہ۔
سندھ میں تیسرا ترمیمی بلدیاتی آرڈنینس جاری۔
بنگلہ دیش میں ملا عبدالقادر کو پھانسی دینے کے خلاف دوسرے روز بھی احتجاج۔
اور
کبڈی ورلڈکپ کے فائنل میں پاکستان اور بھارت کا ٹکراﺅ۔

خبروں کی تفصیل:۔

تحریک انصاف کے چیئرمین عمران خان نے 22 دسمبر کو مہنگائی کے خلاف ملک گیر احتجاج کا اعلان کیا ہے۔ لاہور میں پریس کانفرنس کرتے ہوئے چیئرمین تحریک انصاف نے کہا کہ حکومت کا ہنی مون پیریڈ ختم ہوچکا، ہم نے وفاقی حکومت کو بہت مواقع دیے۔ انہوں نے کہا کہ 22 دسمبر کو مہنگائی کے خلاف تاریخی احتجاج کیا جائے گا جو ملک گیر ہوگا۔ عمران خان نے کہا کہ پنجاب کے4 حلقوں میں انگوٹھوں کے نشانات کی تصدیق کرائی جائے، حکومت نے اعتراف کیا ہے کہ ہرحلقے میں 60 سے 70 ہزار ووٹ غیرتصدیق شدہ ہیں،اگر60 سے 70 فی صد ووٹ جعلی ہیں تو انتخابات کا کیا فائدہ، ہم تو صرف 4 حلقوں کی بات کر رہے ہیں، جس دن سپریم کورٹ نے 4 حلقوں کی تصدیق کرائی، تاریخی دھاندلی آئے گی، اگرپنجاب میں انتخابات درست ہوئے ہیں توصوبائی حکومت کو کس بات کا خوف ہے۔ عمران خان نے کہا کہ عام انتخابات میں پاکستان کی جمہوریت پرڈاکا ڈالا گیا، اگربلدیاتی انتخابات بھی ایسے کرانے ہیں تو نہیں کرائے جائیں، بلدیاتی انتخابات عدلیہ کی نگرانی میں ہونے چاہئیں۔

چیئرمین نیب چوہدری قمر الزمان اوروفاقی ٹیکس محتسب عبدالروف چوہدری نے این آئی سی ایل کیس کی تحقیقات مکمل ہونے تک رخصت پر رہنے کا فیصلہ کیا ہے۔۔ چوہدری قمر الزمان کی رخصت کا کل آخری روز ہے۔ذرائع کے مطابق این آئی سی ایل کیس کے تفتیشی افسرظفر قریشی نے چھ صفحات پر مشتمل بیان مشترکہ تحقیقاتی ٹیم کو جمع کرا دیا۔ اس میں کہا گیا ہے چوہدری قمر الزمان نے ہر موقع پر ان کا دفاع کیا۔ ٹیم نے نرگس سیٹھی، عبدالروف چوہدری، ظفر قریشی،چوہدری قمر الزمان ،سابق ڈی جی ایف آئی اے ملک اقبال کے بیانات قلمبند کرلیے۔ملزمان سے تحریری بیانات بھی لیے گئے ہیں۔ تحریری بیانات کا این آئی سی ایل کیس کے سرکاری ریکارڈ سے موازنہ کیا جارہا ہے جس کے بعد حتمی رپورٹ میں ذمہ داروں کا تعین کیا جائے گا۔ رپورٹ کی روشنی میں این آئی سی ایل کیس کی تفتیش پر اثرانداز ہونے والوں کے خلاف کارروائی کی جائے گی۔

قائم مقام گورنر سندھ نے تیسرا ترمیمی بلدیاتی آرڈیننس جاری کردیا۔ متحدہ قومی موومنٹ نے صوبائی حکومت پر الزام لگایا ہے کہ سندھ کے شہری علاقوں کا مینڈیٹ چھیننے کی سازش کی جارہی ہے۔نئے ترمیمی بلدیاتی آرڈیننس میں پانچ اہم ترامیم شامل کی گئی ہیں۔ ترامیم کے مطابق قومی اور صوبائی اسمبلی کی طرز پر خواتین اور اقلیتی نشستیں پارٹی پوزیشن کے حساب سے ملیں گی۔ میٹروپولیٹن کارپوریشن میں بھی نشستیں پارٹی پوزیشن پر دی جائیں گی۔ شہر کے قریب ذیلی علاقہ بھی شہر میں ہی تصور کیا جائے گا۔ ڈسٹرکٹ کونسل کراچی کی یونین کمیٹیاں دس سے پچاس ہزار آبادی پر مشتمل ہوگی۔آرڈیننس ستمبر سے نافذ العمل ہوگا۔ دوسری جانب ایم کیو ایم رابطہ کمیٹی نے ترمیمی آرڈیننس کو بدنیتی قرار دیا ہے۔ کمیٹی کا کہنا ہے کہ ترمیمی آرڈیننس صوبے کے شہری علاقوں کا مینڈیٹ چھیننے کی سازش ہے۔

بنگلہ دیش میں جماعت اسلامی کے رہنما ملا عبدالقادر کو پھانسی دینے کے خلاف دوسرے روز بھی احتجاج جاری ہے۔ جھڑپوں میں مرنے والوں کی تعداد چھ ہوگئی۔ صبح ہوتے ہی جماعت اسلامی کے کارکنوں نے دارالحکومت ڈھاکہ اور دیگر شہروں میں مظاہرے کیے۔ جماعت اسلامی کے کارکن ملک بھر میں جمعرات سے احتجاج کررہے ہیں۔دوسری جانب سرکار کے حامی ملا عبدالقادر کی پھانسی پر خوشیاں منارہے ہیں۔ مختلف شہروں میں مظاہرین اور حکومت کے حامیوں کے درمیان جھڑپوں میں مرنے والوں کی تعداد چھ ہوگئی ہے۔ غیرملکی خبر رساں ایجنسی کے مطابق امکان ہے کہ جنگی جرائم کے الزام میں مزید لوگوں کو پھانسی دی جائے گی۔

چوتھے مینز کبڈی ورلڈ کپ2013 کا فائنل آج دفاعی چمپئن بھارت اور پاکستان کے درمیان کھیلا جائے گا۔ بھارت میں زورآزمائی اور داو¿ پیچ سے بھرپور جاری میگا ایونٹ اختتامی مرحلے میں داخل ہو گیا ہے اور دو ٹاپ ٹیموں پاکستان اور میزبان بھارت نے عمدہ کارکردگی کی بدولت فائنل میں جگہ بنا رکھی ہے۔ ایونٹ میں کھیلے گئے پہلے سیمی فائنل میں پاکستان نے امریکاکو زیر کر کے فائنل تک رسائی حاصل کی تھی جبکہ دوسرے سیمی فائنل میں میزبان اور دفاعی چمپئن بھارت نے انگلش ٹیم کو زیر کیا تھا۔ پاکستان اور بھارت کی ٹیمیں ایونٹ میں اب تک ناقابل شکست ہیں اور دونوں ٹیموں کی حالیہ فارم اور کارکردگی کو مدنظر رکھتے ہوئے فائنل میں کانٹے دار مقابلے کی توقع کی جا رہی ہے۔