PPI NEWS Bulletin 0800پی پی آئی نیوز بلیٹ

ہیڈ لائینز:۔

نامزد چیف جسٹس تصدق حسین جیلانی آج اپنے عہدے کا حلف اٹھائیں گے
کراچی سے کوئٹہ جانے والی مسافر کوچ الٹ گئی،4مسافر جاں بحق، 8 زخمی
پا کستان اور بھارت کو بات چیت سے تعلقات مضبوط بنانا ہوں گے، فضل الرحمان
بجلی کی طلب میں کمی کے باوجود لوڈشیڈنگ جاری۔
اور
سری لنکا کیخلاف ون ڈے سیریز، قومی ٹیم کا اعلان آج متوقع۔

خبروں کی تفصیل:۔

نامزد چیف جسٹس تصدق حسین جیلانی آج اپنے عہدے کا حلف اٹھائیں گے۔ سپریم کورٹ کے نامزد چیف جسٹس تصدق حسین جیلانی کی تقریب حلف برداری ایوان صدر میں ہوگی۔ صدر ممنون حسین نئے چیف جسٹس تصدق حسین سے ان کے عہدے کا حلف لیں گے۔ ذرائع کے مطابق وزیراعظم نوازشریف، وفاقی وزرا، سفارتکار، ججز حلف برداری کی تقریب میں شرکت کریں گے۔ ذرائع کا کہنا ہے کہ سبکدوش ہونے والے چیف جسٹس افتخار محمد چودھری کی بھی نئے چیف جسٹس کی تقریب حلف برداری میں شرکت کا امکان ہے۔

کراچی سے کوئٹہ جانے والی مسافر کوچ قلات کے قریب الٹ گئی۔ حادثے میں 4 مسافر جاں بحق جبکہ 8 زخمی ہوگئے۔ لیویز ذرائع کے کوئٹہ جانے والی مسافر کوچ کو قلات کے قریب حادثہ پیش آیا ہے۔ واقعہ میں 4 مسافر جاں بحق اور 8 زخمی ہوگئے ہیں۔ لیویز ذرائع کے مطابق زخمیوں کو سول اسپتال قلات منتقل کیا جارہا ہے۔

جمعیت علمائے اسلام (ف) کے سربراہ مولانا فضل الرحمان کا کہنا ہے کہ پاکستان اور بھارت ایک دوسرے کی پرچھائیاں ہیں۔دونوں ممالک کو ہتھیار اٹھانے کے بجائے بات چیت سے تعلقات مضبوط بنانے ہوں گے۔بھارت کے شہر لدھیانا کی جامع مسجد کے دورے کے موقع پرمیڈیا سے گفتگو کرتے ہوئے مولانا فضل الرحمان کا کہنا تھا پاکستان اور بھارت کے درمیان سیاسی اور حکومتی سطح پر تعلقات کو مضبوط بنانا ہوگا۔مسئلہ کشمیر پر بات کرتے ہوئے جے یوآئی کے سربراہ کا کہنا تھا کہ دونوں ممالک نے اس مسئلے کو بات چیت سے حل کرنے کا عزم کیا ہے اور اب اس عزم کو جلد از جلد پایہ تکمیل تک پہنچانا ہوگا۔

بجلی کی طلب میں کمی کے باوجود ملک میں اعلانیہ اور غیر اعلانیہ لوڈ شیڈنگ کا سلسلہ جاری ہے، ملک میں موسم سرد ہوجانے کے باعث ڈیمانڈ میں کمی کی وجہ سے شارٹ فال کم ہو کر نو سومیگاواٹ ہوگیا ہے۔شارٹ فال کم ہو جانے کے باوجود دیہی اور شہری علاقوں میں لوڈ شیڈنگ کے دورانیہ میں خاطر خواہ کمی نہیں آئی ہے پنجاب کے دیہی علاقوں میںچار سے پانچ گھٹنے تک کی لوڈ شیڈنگ کی گئی، بڑے شہروں میں لوڈ شیڈنگ نہیں ہو رہی مگرراولپنڈی میں بارش کے بعد شہر اور گرد و نواح میں غیر اعلانیہ لوڈ شیڈنگ شروع ہوگئی ہے۔

پاکستان کرکٹ بورڈ سلیکشن کمیٹی کی جانب سے سری لنکا کے خلاف سیریز کیلئے قومی ون ڈے ٹیم کا اعلان آج متوقع ہے۔ متحدہ عرب امارات میں پاکستان اور سری لنکا کے درمیان شیڈول ون ڈے سیریز اٹھارہ دسمبر سے شیڈول ہے۔ ون ڈے اسکواڈ کے لیے سلیکشن کمیٹی کل قومی ون ڈے ٹیم کا اعلان کرے گی۔ ذرائع کا کہنا ہے کہ ٹیم کی سلیکشن مصباح الحق ، کوچ اور منیجر سے مشورے کے بعد کی گئی ہے۔ مڈل آرڈر بیٹسمین عمر امین کی ون ڈے میں شرکت مشکوک ہے۔ باقی ٹی ٹوئنٹی اسکواڈ کے موجودہ کھلاڑیوں کو ون ڈے میں برقرار رکھا جائے گا۔ ون اسکواڈ میں فاسٹ بولر عمر گل کی شمولیت کا بھی امکان ہے جن کا کامیاب فٹنس ٹیسٹ میڈیکل بورڈ کے پاس ہے۔