Journalism جرنلزم

جرنلزم۔۔۔ایک چیلنجنگ پروفیشن سمجھا جاتا ہے،دیگر شعبہ جات کی طرح خواتین اس فیلڈ میں بھی نمایاں کارنامے انجام دے رہی ہیں۔ گزشتہ سالوں کے مقابلے میںمیڈیا کی جانب خواتین کے رجحان میں اضافہ ہوا ہے اور صحافت کی تعلیم حاصل کرنے کے بعد خواتین جرنلسٹ مختلف اخبارات و رسائل اور نیوز چینلز سے منسلک ہو کر قومی اور بین الاقوامی سطح پر شہرت حاصل کر رہی ہیں۔
اس سلسلے میں مختلف سرکاری و نجی یونیورسٹیوں کی جانب سے جرنلزم، ماس کمیونکیشن اور انٹر نیشنل ریلیشنز میں ماسٹرز اور بیچلرز کی ڈگری دی جا رہی ہے،اسکے علاوہ ملک بھر میں کئی ادارے صحافت میں پوسٹ گریجویٹ ڈپلومہ اور سرٹیفکیٹ ٹریننگ کی سہولت دے رہے ہیںجہاں جرنلزم سے متعلق ابتدائی تربیت کے ساتھ ساتھ مختلف چینلز اور اخبارات میں انٹرن شپ کے مواقع بھی فراہم کئے جاتے ہیں۔
The News میں بحیثیت ایڈیٹر سپلیمنٹ خدمات انجام دینے والی شہر بانو شعبہ صحافت میں خواتین پروفیشنلز کیلئے موجود مواقع بیان کرتے ہوئے کہتی ہیں:
صحافت سے منسلک ہونے کیلئے زبان و بیاں پر عبور اور کرنٹ افیئرز سے واقفیت کے ساتھ ساتھ خبروں کے حصول کی جستجو اور معاشرتی و سماجی مسائل کو محسوس کرنا اور انھیں منظر عام پر لانے کی صلاحیت رکھنا انتہائی اہم ہے:
صحافت میں رپورٹنگ ایک ایسا شعبہ ہے جس میں خواتین نہ صرف بھر پور طریقے سے اپنی صلاحیتوں کا مظاہرہ کر سکتی ہیں بلکہ خواتین رپورٹرز ہی ہیں جو مختلف طبقات سے تعلق رکھنے والی خواتین کے مسائل کو اجاگر کر سکتی ہیں:
اس حوالے سےThe News سے منسلک شہر بانو کا کہنا ہے کہ خواتین صحافیوں کیلئے ڈیسک جاب میں نہ صرف ترقی کے مواقع موجود ہیں بلکہ الیکٹرنک اور پرنٹ میڈیا میں پروڈکشن سے منسلک ہو کر وہ اپنے اوقات کار بھی اپنی سہولت کے مطابق ایڈجسٹ کر سکتی ہیں۔
جرنلزم کا شعبہ نہ صرف چیلنجز سے بھر پور ہے بلکہ اس فیلڈ میں خواتین کیلئے آگے بڑھنے کے مواقع بھی موجود ہیں لیکن ضرورت اس بات کی ہے کہ تعلیمی اداروں میں صحافت کی تعلیم حاصل کرنے والی لڑکیاں اس فیلڈ کو بطور پروفیشن اپنائیں اور بطور صحافی اپنی پیشہ ورانہ ذمے داریوں سے انصاف کریں۔