World Poetry Day -عالمی یَوم شاعِری

لفظ اور صوت کی تخلیق کے ساتھ ہی جذبوں کے اظہار کیلئے شاعری جیسا لطیف ترین ذریعہ بھی وجود میں آ گیا تھا جسے دنیا کی ہر قوم اور ہر زبان میں فروغ ملااور یہ سلسلہ آج بھی جاری ہے۔ اسی گداز کو فروغ دینے کے لئے پاکستان سمیت آج پوری دنیا میں

شاعری کا عالمی دن

منایا جارہا ہے۔

اقوام متحدہ کے ادارے یونیسکو کی جانب سے 1999ءمیں ہر سال یہ دن اکیس مارچ کو منایا جا تا ہے ، جس کا مقصد معاشرے میں شاعر اورشاعری کی اہمیت اجاگرکرنا ہے۔

ماضی میں برصغیر سمیت دنیا کے کئی خطوں میں شاعری نے انقلاب کی فضا ہموار کی،جدوجہد آزادی میں اقبال اورجوش کے کردار کو کیسے فراموش کیا جاسکتا ہے،آمریت کیخلاف فیض اورجالب کی آواز آج بھی کانوں میں گونجتی ہے،لیکن آج کا شاعراس روایت کاامین نظرنہیں آتا۔

شاعری جذبے اور احساس کا نام ہے جو دلوں میں گداز اور لہجے میں شائستگی پیدا کرتی ہے۔ شاعری کو عالمی سطح پر منانا جذبات و احساسات کو فروغ دینا ہے کیونکہ خالص جذبے ہی انسانیت کی شناخت اور کائنات کے دوام کا نام ہیں۔

شاعری جب خواجہ فرید، بابا بلھے شاہ اور سلطان باہو کی کافیاں کہلائی تو امن و ایشتی اور اسلام کے فروغ کا ذریعہ بنی،، اقبال کی نظموں کا روپ لیا تو بیداری انساں کا کام کیا،،،فیض اور جالب کے شعروں میں ڈھلی تو انقلاب کا سامان مہیا کیا اور جب ناصر و فراز کو شاعری نے منتخب کیا تو پیار و الفت کی نئی کونپلوں نے جنم لیا۔

شاعری جب عقیدت کے سفر پر گامزن ہوئی تو حفیظ تائب اور انیس و دبیر منظر عام پر آئے۔شاعری کے پیچھے چاہے عقیدت کارفرما ہو یا دنیا داری بہرحال یہ سب محبت کے استعارے ہیں اور تسکین کا سامان۔

اردو شاعری اس لحاظ سے بڑی خوش قسمت ہے کہ اسے عربی قصائد اور فارسی شاعری سے نہ صرف فیضیاب ہونے کی سعادت نصیب ہوئی بلکہ غزل، رباعی اور دیگر اصناف شعری کو برتنے کا سلیقہ اور مواد دونوں میں بڑی عمدگی سے نصیب ہوا۔

اردو غزل شاعری کی ایسی محبوب صنف شعری ہے جس کا جادو ہر دور اور ہر زمانے میں سرفراز رہا ہے۔ بالخصوص حسن و عشق کے مضامین کی رنگا رنگی میںغزل اپنی مثال آپ ہے۔

اردو ادب کی تاریخ کے مطابق دکن کے قلی قطب شاہ اردو کے پہلے صاحب دیوان شاعر ہیں دیگر شعرا میں ولی دکنی، میر تقی میر ،مرزا غالب ، علامہ اقبال اور فیض احمد فیض سمیت دیگر شعرا عالمگیر شہرت کے حامل ہیں۔