PPI News Bulletin 2000 پی پی آ ئی نیو ز بلیٹن

 

ہیڈ لا ئنز :۔

وزیردفاع کا تمام نجی ایئرلائنز کے طیارے گراﺅنڈ کرنے کا حکم
ن لیگ نے طیارہ حادثے کے جوڈیشل کمیشن کو مسترد کردیا
کراچی ایئرپورٹ ،متاثرہ طیارہ رن وے سے نہیں ہٹایا جاسکا، آٹھ گھنٹوں سے پروازیں معطل
پاک بھارت مذاکرات پر اعتراض نہیں لیکن مسئلہ کشمیر سردخانے میں نہ ڈالا جائے، یاسین ملک
ایران نے امریکی طرز کا ڈرون بنانے پر کام شروع کردیا
اور
ملک بھر میںآئندہ چوبیس گھنٹوں میں تیز ہواﺅں اور گرج چمک کے ساتھ بارش کا امکان

 

خبروں کی تفصیل :۔

حکومت نے کل سے ملک بھر میں تمام نجی ایئرلائنز کے طیاروں کی پرواز وںپر پابندی عائد کردی ہے اور پروازوں کو فٹنس سرٹیفکیٹ حاصل کرنے سے مشروط کردیا ہے۔ وزیردفاع احمد مختار نے کہا ہے کہ تمام طیاروں کو گراﺅنڈ کرنے کا حکم دیدیا گیا ہے، جو طیارے فٹنس پر پورا اتریں گے صرف انہیں پرواز کی اجازت ہوگی بقیہ جہازوں کو مستقل طور پر گراﺅنڈ کردیا جائیگا۔ وزیردفاع کے احکامات کے بعد جہازوں کی فٹنس کی جانچ پڑتال کا آغا زکل صبح سے ہوگااس حوالے سے تما م نجی ایئر کمپنیوں کو پیغام جاری کردیا گیاہے ۔ وزیردفاع احمد مختار نے بتایا کہ تمام کمپنیوں کو طیاروں کی فٹنس کا سرٹیفکیٹ تین سے چار روز میں حاصل کرنا ہوگا۔ انہوں نے مزید کہا کہ بھوجا ایئرلائنز کا لائسنس منسوخ کرنے پر غور جاری ہے، حادثے کی ابتدائی رپورٹ آنے میں تین سے چار ماہ لگ سکتے ہیں۔

مسلم لیگ ن نے طیارہ حادثے کی تحقیقات کے لیے قائم عدالتی کمیشن کو مسترد کردیا ہے ۔ قومی اسمبلی میں قائد حزب اختلاف چوہدری نثار نے کہا ہے کہ وزیراعظم کی جانب سے قائم تحقیقاتی کمیشن کو عدالتی کمیشن نہیں کہا جاسکتا ، کمیشن میں دو پی سی او ججز شامل ہیں جو حکومت کے منظور نظر ہیں۔ انہوں نے کہا کہ حکومت عوام کو حقائق سے بے خبر رکھنا چاہتی ہے اور ممکن ہے کہ سانحہ مارگلہ کی طرح حکومت سانحہ کورال کی تحقیقات بھی چھپا لے ۔ انہوں نے مطالبہ کیا کہ عدالتی کمیشن چیف جسٹس کی مشاورت کے بعد قائم کیا جائے ۔

کراچی ایئرپورٹ پر حادثے کا شکار طیارہ رن وے سے تاحال نہیں ہٹایا جاسکا جس کے باعث ملکی و ملکی پروازوں کی آمدورفت گزشتہ آٹھ گھنٹوں سے تاحال معطل ہے۔ سول ایوی ایشن کے ذرائع کے مطابق رن وے کو مزید کچھ گھنٹوں کے لیے بند کردیا گیا ہے۔ قبل ازیں سول ایوی ایشن نے رن وے کلیئر کرنے کے لیے پہلے پانچ بجے پھر سات بجے کا وقت دیا اور اب مزید کچھ گھنٹے کا وقت دیا ہے۔ ایئرپورٹ حکام کا کہنا ہے کہ رن وے چھوٹے طیاروں کی آمدو رفت کے لیے کھلا ہوا ہے۔

جموں و کشمیر لبریشن فرنٹ کے سربراہ یاسین ملک نے کہا ہے کہ مسئلہ کشمیر کو سرد خانے میں ڈالنے کی کوشش کو کشمیری عوام قبول نہیں کریں گے، پاکستان، بھارت اور بین الااقومی برادی مسئلے کے حل کیلئے سنجیدہ اقدامات کریں۔ منصورہ میں جماعت اسلامی کے امیر سید منورحسن سے ملاقات کے بعد میڈیا سے گفتگو میںانہوں نے کہا کہ پاک بھارت مذاکرات سے ہمیں اختلاف نہیں، لیکن اس طرح محسوس ہورہا ہے کہ مسئلہ کشمیر کو جان بوجھ کر سردخانے میں ڈالا جارہا ہے۔ انہوں نے کہا کہ اب وقت ضائع کیے بغیر پاکستان اور بھارت کشمیریوں کو مذاکراتی عمل میں شریک کریں۔ اس موقع پر امیر جماعت اسلامی سید منورحسن کا کہنا تھا کہ جمہوری حکومت اور کشمیر کمیٹی مسئلہ کشمیر کو سرد خانے میں ڈال رہے ہیں۔

ایران نے قبضے میں لیے گئے امریکی ڈرون جیسا طیارہ بنانے پر کام شروع کردیا ہے۔ ایرانی حکام نے تہران میں میڈیا کو بتایا کہ امریکی ڈرون جیساطیارہ بنانے پر کام جاری ہے اور ایرانی انجینئرز اس کام میں مصروف ہیں۔ اطلاعات کے مطابق ایرانی انجینئروں نے امریکی ڈرون میںموجود انٹیلی جنس معلومات جمع کرنے والے کمپیوٹرائزڈ نظام کو ڈی کوڈ بھی کرلیا ہے اور حاصل ہونے والی معلومات کا جائزہ لیا جارہا ہے۔ حکا م کا کہنا ہے کہ ایران جلد ریڈار پر نظر نہ آنے والا جدید ڈرون بنانے میں کامیاب ہوجائے گا۔

محکمہ موسمیات کے مطابق آئندہ چوبیس گھنٹوں کے دوران شما ل مشرقی بلو چستان،خیبر پختونخواہ ،گلگت بلتستان ،اور کشمیر میں کہیں کہیں جبکہ پنجاب میں چند ایک مقاما ت پر تیز ہوائیں چلنے کے علا وہ گر ج چمک کے ساتھ با ر ش کا امکا ن ہے ۔جبکہ ملک کے با قی حصوں میں مو سم خشک رہے گا ۔آج ملک کے چند شہروں میںزیادہ سے زیادہ اور کم سے کم درجہ حرارت کچھ اسطرح رہا ۔ اسلام آباد29اور 16 ،لاہور33اور20، کراچی33اور25، پشاور22اور18، کوئٹہ22اور06، مظفرآباد21اور15، لاڑکانہ36 اور14، حیدرآباد37اور21، سکھر35اور21، ساہیوال34اور17،سر گو دھا 30اور17بہاولنگر35اور20، فیصل آباد32اور17جبکہ ڈیرہ اسمعیل خان میںزیادہ سے زیادہ31اورکم سے کم17ڈگری سینٹی گریڈرہا۔