ہیڈلائنز:۔

پنجاب کا بجٹ پیش، اسی ہزار نئی اسامیوں کا اعلان
آئندہ مالی سال کا بجٹ عوام دوست ہے، وزیراعلیٰ پنجاب
وفاقی وزیر پیٹرولیم نے سی این جی ایسوسی ایشن کو مافیا قرار دیدیا
ملک کے بیشتر حصوں میں سی این جی اسٹیشنز تیسرے روز بھی بند، عوام پریشان
قومی ہاکی ٹیم دورہ یورپ کیلئے روانہ
اور
ملک کے بیشتر علاقوں میں موسم گرم اور خشک رہنے کا امکان

خبروں کی تفصیل:۔

پنجاب کا 782 ارب روپے کا بجٹ پیش کردیا گیا، مزدور کی کم سے کم تنخواہ 9 ہزار روپے کرنے اور سرکاری ملازمین کی تنخواہوں اور پنشن میں 20 فیصد اضافے اور 80 ہزار نئی اسامیاں پیدا کرنے کا اعلان کیا گیا ہے۔مجتبیٰ شجاع الرحمان نے بجٹ پیش کیا۔بجٹ میں سالانہ ترقیاتی پروگرام کیلئے 250 ارب روپے مختص کئے گئے ہیں، توانائی بحران پر قابو پانے کیلئے آئندہ مالی سال10 ارب روپے مختص کرنے کا فیصلہ کیا گیا ہے۔ مجتبیٰ شجاع الرحمان نے مزید کہاکہ صوبائی حکومت کی جانب سے سادگی اپناتے ہوئے اراکین اسمبلی کے اخراجات میں مزید 5 فیصد کمی کرکے 30 فیصد کمی لائی گئی ہے۔ ان کا کہنا تھاکہ کسانوں کوریلیف دینے کی غرض سے گرین ٹریکٹر اسکیم کیلئے 2 ارب روپے مختص کئے گئے ہیں۔ صوبائی وزیر خزانہ کا کہنا تھا طلبہ کو آئندہ مالی سال 1 لاکھ 25 ہزار لیپ ٹاپ کو فراہم کئے جائیں گے، جبکہ 80 ہزار سے زائد نئی اسامیاں پیدا کی جائیں گی،گندم پر سبسڈی کیلئے 27 ارب 50 کروڑ روپے اور رمضان ریلیف پیکیج کی مد میں 4 ارب روپے فراہم کئے جائینگے۔ پنجاب بجٹ میں مفت ڈائلسس کیلئے 20 کروڑ، ووکیشنل ٹریننگ انسٹی ٹیوٹ کیلئے ایک ارب 50 کروڑ روپے اور گوجرانوالہ، ملتان اور سیالکوٹ میں مزدوروں کیلئے رہائشی اسکیموں اور پولیس میں میں 10 ہزار نئی بھرتیوں کا اعلان کیا گیاہے۔

وزیراعلیٰ پنجاب میاں شہباز شریف نے آئندہ مالی سال کے صوبائی بجٹ کو عوام دوست قرار دیدیا۔ پنجاب اسمبلی میں خطاب کے دوران وزیراعلیٰ نے کہا کہ آئندہ مالی سال میں بھی لیپ ٹاپ اسکیم کو جاری رکھا جائے گا۔ انھوں نے کہا کہ مسلم لیگ ن کی صوبائی حکومت نے عوام دوست بجٹ پیش کیا ہے، جس سے صوبے کی ترقی یقینی ہوگی۔انھوں نے کہا کہ ہم نے پنجاب کو تقسیم کرنے کی سازش ناکام بنادی ہے۔وزیراعلیٰ پنجاب کا کہنا تھا کہ ہم نے ترقیاتی بجٹ میں اضافہ جبکہ غیر ضروری اخراجات میں کمی کی ہے، جبکہ ہر شعبے کیلئے رقم رکھی گئی ہے۔انھوں نے کہا کہ جنوبی پنجاب میں غریب افراد اور تعلیم کیلئے خصوصی فنڈز رکھے گئے ہیں، جبکہ خواتین کیلئے ملازمتوں میں الگ کوٹہ مختص کیا گیا ہے۔

وفاقی وزیر پیٹرولیم ڈاکٹر عاصم حسین نے سی این جی ایسوسی ایشن کو مافیا قرار دیدیا۔ اسلام آباد میں میڈیا سے بات چیت کے دوران وفاقی وزیر پیٹرولیم نے کہا کہ سی این جی مالکان چاہتے ہیں کہ ساری گیس انہیں دیدی جائے، سی این جی اسٹیشنز کو عوام کا خیال رکھنا چاہئے۔انھوں نے کہا کہ اگر کوئی سڑکوں پر فیصلہ کرنا چاہتا ہے تو اسکی مرضی ہے۔وفاقی وزیر پیٹرولیم کا کہنا تھا کہ سی این جی مصنوعات پر کوئی نیا ٹیکس نہیں لگا ہے، بلکہ یہ ابھی صرف تجویز ہے۔

پاکستان سی این جی ایسوسی ایشن کی کال پر آج ملک کے بیشتر حصوں میں تیسرے روز بھی ہڑتال رہی۔پنجاب کے پانچ ریجنز میں گیس اسٹیشنز کی بندش کو چھ روز ہوگئے جس سے شہریوں کی مشکلات میں مزید اضافہ ہوگیا ہے۔سی این جی لوڈمینجمنٹ کی ہفتہ وار اور آل پاکستان سی این جی ایسو سی ایشن کی ہڑتال کے باعث لاہور، گوجرانوالہ،ملتان،فیصل آباد،ساہیوال اور شیخوپورہ ریجنز میں سی این جی اسٹیشنز چھ روز سے بند ہیں۔ دور دراز علاقوں میں کچھ پمپس چوری چھپے سی این جی فراہم کر رہے ہیں جہاں میں گاڑیوں کی طویل قطاریں لگی ہوئی ہیں۔ سی این جی نہ ملنے پر ٹرانسپورٹرز نے گاڑیاں کھڑی کردی ہیں اور سڑکوں پر ٹریفک بہت کم ہے۔موقع سے فائدہ اٹھاتے ہوئے ٹرانسپورٹرز نے کرایوں میں ازخود اضافہ کردیا ہے، شہروں میں ٹیکسی اور رکشہ والے بھی منہ مانگے پیسے مانگ رہے ہیں۔پاکستان پیٹرولیم ڈیلرز ایسو سی ایشن کی جانب سے آج ہڑتال میں شامل ہونے سے عوام کو مزید مشکلات کا سامنا کرنا پڑا ہے۔سی این جی ایسوسی ایشن کا کہنا ہے کہ بجٹ میں لگایا گیا نیا ٹیکس واپس لینے تک ہڑتال اور احتجاجی مظاہرے جاری رہیں گے۔

قومی ہاکی ٹیم دورہ یورپ کیلئے لاہور روانہ ہوگئی، دس روزہ دورے میں بیلجیئم، ہالینڈ اور جرمنی کے خلاف میچز کھیلے گی۔قومی ہاکی ٹیم دس روزہ دورے کا باقاعدہ آغاز بیلجیم کے خلاف گیارہ جون کو میچ سے کرے گی۔ ہاکی ٹیم ہالینڈ اور جرمنی کے خلاف بھی میچز کھیلے گی۔ علامہ اقبال انٹرنیشل ایئر پورٹ پر روانگی سے قبل میڈیا سے گفتگو کرتے ہوئے قومی ٹیم کے کوچ خواجہ جنید کا کہنا تھا کہ ٹیم دورے میں متحد ہوکر کھیلے گی اور بہترین کا رکردگی پیش کرے گی۔

محکمہ موسمیات نے آئندہ چوبیس گھنٹوں کے دوران ملک کے بیشتر علاقوں میں موسم گرم اور خشک رہنے کی پیشگوئی کی ہے، تاہم مالاکنڈ، ہزارہ، راولپنڈی، گوجرانوالہ، سرگودھا، ڈیرہ غازی خان، بنوں ڈویژن، گلگت بلتستان اور آزاد کشمیر میں چند ا یک مقامات پر گرج چمک کیساتھ بارش کا امکان ہے۔ آج ملک کے مختلف شہروں میںزیادہ سے زیادہ اور کم سے کم درجہ حرارت کچھ اس طرح رہنے کا امکا ن ہے ۔ اسلام آباد38اور 21، لاہور41اور 26، کراچی35اور 28، پشاور39اور25، کوئٹہ35اور14، مظفرآباد36اور 18، ساہیوال39 اور 24، سرگودھا 40 اور 26، بہاولنگر 40ا ور 25، فیصل آباد41اور 26 جبکہ ڈیرہ اسمعیل خان میںزیادہ سے زیادہ 40 اورکم سے کم 23ڈگری سینٹی گریڈ رہنے کا امکا ن ہے ۔