ہیڈلائنز:۔

بلیک بیری کمپنی کا حسین حقانی کے پیغامات کا ریکارڈ میمو کمیشن کو دینے سے معذرت
ایبٹ آباد کمیشن کے اجلاس میں وزیرخارجہ کا بیان ریکارڈ
مسلم لیگ ن اور ہم خیال گروپ کے درمیان اتحاد کا اعلان آئندہ چند روز میں متوقع
وزیراعلیٰ پنجاب کی ینگ ڈاکٹرز سے ہڑتال ختم کرنیکی درخواست
افغان صدر کا امریکہ سے سالانہ دو ارب ڈالرز دینے کا مطالبہ

اور

پاکستان میں کل سے بارشوں کا نیا سلسلہ شروع ہونے کا امکان

 

خبروں کی تفصیل :۔

میمو اسکینڈل کیلئے قائم عدالتی کمیشن کو بلیک بیری کمپنی نے حسین حقانی کا ریکارڈ دینے سے معذرت کرلی۔ بلیک بیری کمپنی کا کہنا ہے کہ اس عرصے کا ریکارڈ دستیاب نہیں جس کی درخواست کی گئی ہے۔کمپنی کا کہنا ہے کہ اس کے پاس منصور اعجاز اور حسین حقانی کے پیغامات کا ریکارڈ نہیں، کیونکہ اتنے طویل عرصے تک پیغامات کو محفوظ رکھنے کی پالیسی نہیں۔ خیال رہے کہ میمو کمیشن نے گزشتہ سال مئی، اکتوبر اور نومبر کے مہینوں کے پیغامات کا ریکارڈ مانگا تھا اور حسین حقانی نے یہ ریکارڈ فراہم کرنے کیلئے بلیک بیری کمپنی کو درخواست بھی دی تھی۔

وزیرجہ حنا ربانی کھر نے ایبٹ آباد کمیشن میں اپنا بیان ریکارڈ کرا دیا، ایبٹ آباد میں اسامہ بن لادن کی موجودگی اور امریکی آپریشن کی تحقیقات کیلئے قائم کمیشن کا اجلاس جسٹس جاوید اقبال ریٹائرڈ کی سربراہی میں اسلام آباد میں ہوا۔ ایبٹ آباد کمیشن کی جانب سے طلبی پر وزیر خارجہ حنا ربانی کھر اجلاس میں پیش ہوئیں اور اپنا بیان قلمبند کرایا۔ سرکای اعلامئے کے مطابق سوال و جواب کے سیشن کے دوران وزیر خارجہ نے ایبٹ آباد آپریشن کے حوالے سے اپنی معلومات سے کمیشن کو آگاہ کیا۔ اس سے قبل گذشتہ روز وزیر دفاع احمد مختار بھی کمیشن کے سامنے پیش ہوئے تھے۔ذرائع کا کہنا ہے کہ کمیشن کے سوالات کے جواب میں وزیر دفاع نے ایبٹ آباد آپریشن سے مکمل لاعلمی کا اظہار کیا۔

قومی اسمبلی میں قائد حزب اختلاف چوہدری نثار علی خان نے کہا ہے کہ ہم خیال گروپ سے اتحاد کا اعلان چند آئندہ دنوں میں کر دیا جائے گا۔راولپنڈی میں میڈیا نمائندوں سے گفتگو میں چوہدری نثار علی خان کا کہنا تھا کہ ہم خیال گروپ سے اتحاد کا اعلان آئندہ چند روز میں ہوگا، جبکہ مسلم لیگ ق اور پیپلز پارٹی کے اراکین قومی اسمبلی بھی ہم سے رابطے میں ہیں۔انھوں نے کہا کہ کوئی بھی حکومتی اتحاد پر تنقید نہیں کرتا،مسلم لیگ ق، قاتل کا الزام لگانے والے صدر زرداری کےساتھ شامل ہو گئی ہے۔

وزیراعلیٰ پنجاب میاں شہباز شریف نے ینگ ڈاکٹرز سے ہڑتال ختم کرنے کی درخواست کردی۔اپنے ایک بیان میں میاں شہبازشریف نے کہا کہ ڈاکٹرز کے شعبے میں ہڑتال کا لفظ نہیں ہونا چاہئے۔انھوں نے کہا کہ ہم نے کسی ایڈہاک ڈاکٹر کو فارغ نہیں کیا، بلکہ پبلک سروس کمیشن کے تحت ڈاکٹرز کو ہسپتالوں میں تعینات کیا۔

افغان صدر حامد کرزئی نے مطالبہ کیا ہے کہ افغانستان اور امریکہ کے درمیان طویل المدت شراکت داری کے مجوزہ معاہدے کے تحت ان کے ملک کو سالانہ دو ارب ڈالرز فراہم کئے جائیں۔کابل میں ایک تقریب سے خطاب میں افغان صدر نے یہ مطالبہ ایک ایسے وقت کیا ہے جب مجوزہ معاہدے پر ہونے والی بات چیت میں فریقین بظاہر اتفاق رائے کے قریب پہنچ چکے ہیں۔صدر کرزئی نے کہا کہ مذاکرات میں امریکی اس بات کی یقین دہانی کرارہے ہیں کہ مستقبل میں مالی امداد میں اضافہ کیا جائے گا۔تاہم ہم انھیں بتا رہے ہیں کہ معاہدے میں تحریر کیا جائے کہ امریکہ افغان فورسز کے لیے سالانہ کم از کم دو ارب ڈالر دے گا۔ انھوں نے کہا کہ اگر امریکہ اس رقم میں اضافہ کرنا چاہے گا تو کم ازکم لکھ دینے سے کسی بھی مرحلے پر معاہدے میں تبدیلی کی گنجائش رہے گی۔

محکمہ موسمیات نے کہا ہے کہ مغربی ہواﺅں کا کم دباﺅ پاکستان میں داخل ہونا شروع ہوگیا ہے، جس کے زیراثر کل سے بلوچستان کے ساحلی علاقوں میں موسلادھار بارش شروع ہونے کا امکان ہے، جسکے نتیجے میں مقامی ندی نالوں میں طغیانی کا خدشہ ہے ،جبکہ کل رات سے بارش کا یہ سلسلہ شمالی بلوچستان، مغربی سندھ، خیبرپختونخواہ، پنجاب، گلگت بلتستان اور کشمیر تک پھیلنا شروع ہوجائے گا۔ آ ئندہ24گھنٹوں کے دوران وسطی و جنوبی پنجاب، خیبرپختونخواہ، شمال مشرقی بلوچستان، مکران اورسکھر ڈویژن میں چند ایک مقامات پر گر ج چمک کے ساتھ با رش کا امکان ہے ۔آج ملک کے چند شہروں میںزیادہ سے زیادہ اور کم سے کم درجہ حرارت کچھ اسطرح رہا ۔ اسلام آباد30اور 13 ،لاہور31اور17، کراچی34اور25، پشاور32اور17، کوئٹہ26اور13، مظفرآباد30اور12، لاڑکانہ41اور21، حیدرآباد40اور23، سکھر39اور24، ساہیوال35اور16،بہاولنگر38اور19، فیصل آباد31اور18جبکہ ڈیرہ اسمعیل خان میںزیادہ سے زیادہ30اورکم سے کم14ڈگری سینٹی گریڈرہا۔