ہیڈلائنز:۔

سپریم کورٹ نے الیکشن کمیشن کو ناکارہ اور غیرمتحرک قرار دیدیا
مولانا فضل الرحمن کا کشمیر پالیسی پر نظرثانی کا مطالبہ
ایبٹ آباد کمیشن کے اجلاس میں حتمی رپورٹ کی تیاری پر مشاورت
وزارت پیٹرولیم کی عدم ادائیگیوں پر پاورسیکٹر کو فرنس آئل کی فراہمی روکنے کی دھمکی
پنجاب کے صنعتی شعبے کیلئے لوڈشیڈنگ دورانیے میں کمی کا فیصلہ
اور
بنگلہ دیش کا دورہ پاکستان،قذافی اسٹیڈیم میں تیاریاں شروع

 

خبروں کی تفصیل :۔

 

سپریم کورٹ نے انتخابی اصلاحات کیس کی سماعت کے دوران الیکشن کمیشن کو ناکارہ اور غیر متحرک قرار دیدیا۔ چیف جسٹس افتخار محمد چوہدری کی سربراہی میں تین رکنی بینچ نے مقدمے کی سماعت کی۔سماعت کے دوران چیف جسٹس افتخار چوہدری نے کہا کہ اسمگلر چاہے تو الیکشن میں پورے ملک کو خرید لے،الیکشن کمیشن نے کبھی زائد اخراجات کی تحقیقات نہیں کی۔الیکشن کمیشن کے ڈائریکٹر جنرل شیر افگن نے عدالت کو بتایا کہ بڑی سیاسی جماعتیں الیکشن کمیشن کو غلط اکاو¿نٹس بتاتی ہیں،جس پر چیف جسٹس نے ریمارکس دیئے کہ الیکشن کمیشن سیاسی جماعتوں کے اکاو¿نٹس کی جانچ پڑتال نہیں کرتا تو پھر سیاسی جماعتیں اپنے اکاو¿نٹس پوسٹ آفس کو بھجوا دیا کریں۔ جسٹس طارق پرویز نے ریمارکس دیئے کہ پاکستان میں فنڈز پارٹی کو نہیں پارٹی سربراہ کے پاس چلے جاتے ہیں۔

مولانا فضل الرحمن نے حکومت سے کشمیر پالیسی پر نظر ثانی کا مطالبہ کر دیا۔ ان کا کہنا ہے کہ پاکستان نے یہ مسئلہ حل کرنے کے لیے کبھی سنجیدہ کوشش نہیں کی۔ایوان وزیر اعلیٰ لاہور میں وزیر اعلیٰ پنجاب میاں شہباز شریف کے ہمراہ پریس کانفرنس کرتے ہوئے مولانا فضل الرحمن نے کہا کہ کشمیریوں کی جدوجہد آزادی کے لیے ہے انہیں دہشت گرد کہنا درست نہیں۔ ان کا کہنا تھا کہ موجودہ خارجہ پالیسی میں بھی کشمیر کو پس پشت ڈال دیا گیا اور جب بھی کشمیر پر مذاکرات ہوں پانی کا مسئلہ ضرور زیر بحث آنا چاہئیے۔ ایک سوال پر مولانا فضل الرحمن نے واضح انداز میں کہا کہ پارلیمنٹ کی سفارشات میں نیٹو سپلائی بحال کرنے کی منظوری نہیں دی گئی ہے۔ اس موقع پر میاں شہباز شریف کا کہنا تھا کہ کشمیر اور پانی دونوں گھمبیر مسائل ہیں۔ ایک سوال پر انہوں نے کہا کہ جب تک اغیار سے جان نہیں چھڑائیں گے کشمیر کا مسئلہ حل نہیں ہو سکتا۔

ایبٹ آباد آپریشن کی تحقیقات کرنے والے انکوائری کمیشن کا اجلاس جسٹس ریٹائرڈ جاوید اقبال کی زیرصدارت اسلام آباد میں جاری ہے۔ کمیشن کے اجلاس میں حتمی رپورٹ کی تیاریوں کے حوالے سے مشاورت کی جارہی ہے، جبکہ اعلیٰ سرکاری افسران کے بیانات بھی قلمبند کئے جارہے ہیں۔ ذرائع کے مطابق کمیشن کا کام آخری مراحل میں داخل ہوچکا ہے اور اس ماہ کے آخر تک حتمی رپورٹ اور سفارشات مکمل ہونے کا امکان ہے۔

وزارت پیٹرولیم نے بھاری بقایاجات کی عدم ادائیگی پر پاور سیکٹر کو فرنس آئل کی فراہمی روک دینے کی دھمکی دی ہے۔اطلاعات کے مطابق وزارت پیٹرولیم نے خزانہ، پانی و بجلی کی وزارتوں کو ایک خط میں پاکستان اسٹیٹ آئل کے بقایاجات کی فوری ادائیگی کیلئے کہا ہے۔اس وقت پاور سیکٹر پر پی ایس او کے قرضے 800 ملین یومیہ کے حساب سے بڑھ رہے ہیں جبکہ ادائیگیاں محض 200 ملین روپے یومیہ ہیں۔ یہی وجہ ہے کہ وزارت پیٹرولیم و قدرتی وسائل نے اپنے خط کے ذریعہ وزارت خزانہ سے فوری طور پر 40 ارب روپے مانگے ہیں تاکہ پی ایس او کو نادہندہ ہونے سے بچایا جاسکے ورنہ ایندھن کی فراہمی روک دی جائے گی۔ بجلی سمیت توانائی کے تمام شعبوں پر پی ایس او کے مجموعی طور پر 197 ارب روپے واجب الادا ہیں۔

وفاقی حکومت نے پنجاب میں صنعتی شعبے کیلئے بجلی کی لوڈشیڈنگ کے دورانیے میں کمی لانے کا فیصلہ کیا ہے۔ اس حوالے سے صنعتکاروں اور حکومتی نمائندوں کا مشترکہ اجلاس ہوا، جس میں پنجاب میں تمام اسپننگ ملز کو لوڈشیڈنگ سے چھوٹ دینے کا فیصلہ کیا گیا، جبکہ پاور لومز اور ٹیکسٹائل سیکٹر کیلئے بجلی کی بندش کا دورانیہ چار گھنٹے کرنے پر اتفاق کیا گیا۔

بنگلہ دیش کے دورہ پاکستان کے پیش نظر پی سی بی نے تیاریوں کاآغاز کردیا۔ اس سلسلے میں قذافی اسٹیڈیم کی تزئین نو کا کام جاری ہے ۔ پی سی بی حکام کے مطابق قذافی اسٹیڈیم لاہور کی تزئین و آرائش کاکام پچیس اپریل تک مکمل کرلیا جائیگا، جبکہ مہمان ٹیم کی حفاظت کو یقینی بنانے کیلئے اسٹیڈیم کے اندر اور باہر سیکیورٹی کا خصوصی انتظام کیا جائیگا۔