PPI NEWS Bulletin 1800 پی پی آئی نیو ز بلیٹن

ہیڈ لا ئنز:۔

امریکی و پاکستانی عسکری قیادت کی ملاقات، جنرل کیانی نے سلالہ حملے کی رپورٹ مسترد کردی

بجلی کی طویل بندش کے خلاف ملک کے مختلف شہروں میں احتجاجی مظاہرے

سندھ بھر میں اسلحہ لے کر چلنے پر پھر پابندی لگا دی گئی

پاکستان کا ایران گیس پائپ لائن منصوبے پر روس سے مالی مدد لینے کا فیصلہ

کرم ایجنسی میں سیکو رٹی فو رسز کی کا روائی میں 12شد ت پسندہلاک

اور
لیڈی ہیلتھ ورکرز کو تنخواہوں کی فوری ادائیگی کا حکم

خبروں کی تفصیل :۔

آرمی چیف جنرل اشفاق پرویز کیانی نے سلالہ چیک پوسٹ پر حملے سے متعلق رپورٹ مسترد کر دی۔ ذرائع کے مطابق آرمی چیف جنرل اشفاق پرویز کیانی سے امریکی سینٹ کام کے سربراہ جنرل جیمز میٹس اور افغانستان میں ایساف کمانڈر جنرل جان ایلن نے راولپنڈی میں ملاقات کی۔ ذرائع کے مطابق ملاقات کے دوران جنرل اشفاق پرویز کیانی نے سلالہ چیک پوسٹ پر حملے سے متعلق امریکی رپورٹ مسترد کر دی ہے۔ ذرائع کا کہنا ہے کہ جنرل کیانی نے ڈرون حملوں کی پیشگی اطلاع سے متعلق امریکی پیشکش کو بھی مسترد کر دیا ہے۔ جنرل جیمز میٹس اور جان ایلن چیئرمین جوائنٹ چیفس آف اسٹاف جنرل خالد شمیم وائیں سے بھی ملاقات کریں گے۔ ملاقاتوں میں سلالہ چیک پوسٹ پر حملے کی تحقیقات، پاک افغان بارڈر پر روابط موثر بنانے اور خفیہ معلومات کے تبادلے پر بات چیت کی جائے گی۔ سلالہ چیک پوسٹوں پر نیٹو حملے کے بعد پاکستان اور امریکی افواج کے درمیان یہ پہلا اعلیٰ سطح کا رابطہ ہے۔

بجلی کی طویل بندش کے خلاف آ ج بھی ملک کے مختلف شہروں میں احتجاج کیا گیا۔ لاہو رمیں مشتعل شہریوں نے لیسکو کے دفتر پردھاوا بول دیا اور توڑ پھوڑ کی۔ توانائی کے بحران نے عوام کو سڑکوں پر آنے اور احتجاج کرنے پر مجبور کررکھا ہے اور پنجاب میں شہری بہت زیادہ مشتعل ہوچکے ہیں۔ شہریوں کو بجلی نہ ملی تو انہوں نے لیسکو کے دفتر پر حملہ کردیا جہاں عملے نے بھاگ کر جان بچائی ۔ مشتعل شہریوں نے پورے دفتر میںتو ڑ پھوڑکر سامان نذرآتش کردیا ۔ دوسری جانب لیسکو کے چیف ایگزیکٹو نے عوامی کو بجلی کی فراہمی کے بجائے مزید دفاتر کی توڑ پھوڑ سے نمٹنے کے لیے ہنگامی اجلاس طلب کرلیا۔ عوام کا کہنا ہے کہ بجلی ہے نہیں اس کے باوجود بل ہزاروں روپے کا آرہا ہے ۔ ادھر فیصل آباد بھی اندھیروں کی نذر ہے جہاں لوڈشیڈنگ کے خلاف مظاہرے کئی روز سے جاری ہیں۔ مظاہرین نے آج فیض آباد چوک بلاک کیا اور احتجاجاً ڈھول بجاتے ہوئے بھنگڑا ڈالا۔ سندھ خیبر پختونخوا ہو یا بلوچستان ہر جگہ بجلی کی آنکھ مچولی جاری ہے۔چمن میں بجلی کی بیس بیس گھنٹے طویل لوڈ شیڈنگ کے خلاف تاجروں نے ریلی نکالی ۔ ان کا کہنا تھا کہ غیر اعلانیہ لوڈ شیڈنگ نے ان کی زندگی اجیرن کردی ہے اور روزانہ لاکھوں روپے کا نقصان اٹھانا پڑرہا ہے۔

سندھ حکومت نے صوبے بھر میں دفعہ 144کے تحت اسلحہ لے کر چلنے پر پابندی عائد کردی ہے۔ محکمہ داخلہ سندھ کی جانب سے جاری نوٹی فکیشن کے مطابق صوبے بھر میں ہرقسم کا ممنوعہ اور غیر ممنوعہ بورکااسلحہ لے کر چلنے پر پابندی ہوگی۔ پابندی کا اطلاق فوری طور پر ہوگا اور پابندی تاحکم ثانی نافذ رہے گی۔ واضح رہے کہ ایک ہفتہ قبل اسلحہ لے کر چلنے کی اجازت دی گئی تھی تاہم امن و امان کی مخدوش صورتحال کے پیش نظر اب یہ اجازت واپس لے لی گئی ہے۔

پاکستان نے ایران گیس پائپ لائن منصوبے پر روس سے مالی مدد لینے کا فیصلہ کیا ہے جس کے لیے دو اپریل کو پاکستانی وفد ماسکو روانہ ہوگا۔ سیکریٹری پیٹرولیم اعجاز چوہدری کے مطابق پاک ایران گیس پائپ لائن پر چینی کمپنی کے مالی تعاون سے انکار کے بعد روسی کمپنی کو شامل کرنے کا فیصلہ کیا گیا ہے تاکہ منصوبے میں حائل مالی رکاوٹ دور کی جاسکے۔ انہوں نے بتایا کہ اس ضمن میں پاکستانی وفد دو اپریل کو ماسکو جائے گا اور منصوبے پر معاملات طے کریگا ۔ ذرائع کے مطابق روس کی جانب سے مالی تعاون پر مثبت رد عمل کی توقع ہے۔

قبا ئلی علا قے کر م ایجنسی میں سیکو رٹی فو رسز کی کا روائی میں 12شد ت پسند ما رے گئے ۔اطلا عا ت کے مطابق وسطی کر م میں شد ت پسندوں نےسیکو رٹی فو رسز کے قافلے پر حملہ کیا،جس کے نتیجے میں4سیکو رٹی اہلکا ر زخمی ہوگئے ۔سیکو رٹی فو رسز کی جوابی میں کا روائی میں 12شد ت پسند ہلا ک اور متعدد زخمی ہوگئے ۔

وفاقی حکومت نے لیڈی ہیلتھ ورکرز کو تنخواہوں کی فوری ادائیگی کے احکامات جاری کر دیے ہیں۔وزیراعظم کی ہدایت پر خصوصی کمیٹی کا اجلاس وفاقی وزیر خورشید شاہ کی زیر صدارت وزیراعظم ہاوس میں ہوا۔ کمیٹی نے سیکرٹری پلاننگ ڈویژن کو لیڈی ہیلتھ ورکرز کی تنخواہیں فوری طور پر ادا کرنے کی ہدایت کی۔ اجلاس میں وزیر اعظم کی خصوصی معاون شہناز وزیرعلی کی سربراہی میں کمیٹی بھی قائم کر دی گئی۔ کمیٹی دو ہفتے میں اپنی تجاویز تیار کرے گی جنہیں منظوری کیلئے وزیر اعظم کو پیش کیا جائے گا۔