PPI NEWS Bulletin 2000 پی پی آئی نیوز بلیٹن

ہیڈلائنز:۔

بلوچستان اسمبلی کا اجلاس کے دوران وزیراعلیٰ اسلم رئیسانی کی قیادت پر اظہار اعتماد
ایم کیو ایم کا حکومت سے کراچی میں ایمرجنسی نافذ کرنے کا مطالبہ
حج کرپشن کیس، ایف آئی اے نے یوسف رضا گیلانی کو بیٹے سمیت طلب کرلیا
کشمیر کو بھارتی ریاست قرار دینے پر وزارت داخلہ نے معافی مانگ لی
افغانستان میں 2014ءکے بعد امریکی فوجیوں کی تعداد پر فیصلہ آئندہ چند ہفتوں میں ہوگا، امریکی وزیر دفاع
ڈھاکہ ٹیسٹ کا پہلا روز، بنگلہ دیش کے خلاف ویسٹ انڈیز کے چار وکٹ پر 361 رنز
اور
ملک کے بیشتر حصوں میں موسم خشک رہنے کا امکان

خبروں کی تفصیل:۔

بلوچستان اسمبلی کے اجلاس کے دوران ایوان نے وزیراعلیٰ نواب اسلم رئیسانی کی قیادت پر اعتماد کا اظہار کرتے ہوئے صوبے کی صورتحال پرقرارداد بھی پیش کردی۔بلوچستان اسمبلی کا اجلاس قائم مقام اسپیکر سید مطیع اللہ آغا کی زیرصدارت میں شروع ہوا،اجلاس کے آغاز میں سینئر صوبائی وزیر مولانا عبدالواسیع نے ایوان میں مشترکہ قرارداد پیش کی،قرارداد کے متن کے مطابق اندرونی وبیرونی سازشوں کی وجہ سے امن وامان کی صورتحال خراب ہے جس سے صوبے کے عوام کومشکلات کا سامناہے،قرارداد میں کہا گیا تھا کہ ایوان کافرض ہے کہ معاملات کاجائزہ لیاجائے،قرارداد میں زور دیا گیا کہ صوبے کی بہتری کیلئے متفقہ لائحہ عمل اور یکجہتی پرعملدرآمدیقینی بنایاجائے،صوبائی اسمبلی کے اجلاس میں مخلوط حکومت میں شامل تمام پارلیمانی جماعتوں کی نمائندگی موجود تھی تاہم پیپلز پارٹی کے صوبائی صدر اور صوبائی وزیر میر صادق عمرانی اور پیپلز پارٹی کے ہی صوبائی وزیر کوالٹی ایجوکیشن جان علی چنگیزی سمیت اپوزیشن کے کسی رکن نے اجلاس میں شرکت نہیں کی۔

متحدہ قومی موومنٹ نے حکومت سے کراچی میں ایمرجنسی نافذ کرنے کا مطالبہ کردیا۔ یہ مطالبہ سینیٹ اجلاس سے خطاب کرتے ہوئے ایم کیو ایم کے رہنماءمصطفیٰ کمال نے کیا۔ انھوں نے کہا کہ وزیراعظم ایمرجنسی نافذ کرکے کراچی کے حالات بہتر بنانے کے لئے کام کریں۔ انھوں نے کہا کہ اس وقت کراچی جل رہا ہے، وزیراعظم تمام چھوڑ کر کراچی جائیں اور حالت بہتر کرائیں۔ انکا کہنا تھا کہ وزیراعظم ایک ہفتے تک کراچی میں قیام کریں اور تمام اسٹیک ہولڈرز سے ملاقاتیں کریں۔بعد ازاں قومی اسمبلی کی طرح سینیٹ سے بھی ایم کیو ایم اراکین کراچی بدامنی کے خلاف واک آﺅٹ کیا۔

وفاقی تحقیقاتی ادارے ایف آئی اے نے سابق وزیراعظم یوسف رضا گیلانی کو حج کرپشن کیس میں طلب کرلیا۔تفصیلات کے مطابق حج کرپشن کیس کے تحقیقاتی افسر حسین اصغر نے سابق وزیراعظم کو سولہ نومبر کو طلب کیا ہے۔ ایف آئی اے نے یوسف رضا گیلانی کے بیٹے عبدالقادر گیلانی اور ان کے دوست زین سکھیرا کو بھی سولہ نومبر کو طلب کرلیا ہے۔ذرائع کے مطابق ایف آئی اے کی جانب سے عبدالقادر گیلانی سے مرسیڈیز گاڑی خریدنے پر تفتیش ہوگی، جبکہ یوسف رضا گیلانی سے پوچھا جائے گا کہ زین سکھیرا کو کنٹریکٹ کیوں دیا۔

وزارت داخلہ نے کشمیر کو بھارتی ریاست قرار دینے پر قوم سے معافی مانگ لی ہے۔قائمہ کمیٹی برائے امور کشمیر کا اجلاس چئیرمین مولانا فضل الرحمان کی زیر صدارت اسلام آباد میں ہوا۔ کمیٹی نے وزارت داخلہ کی جانب سے سپریم کورٹ میں جمع کروائے جانے والے بیان میں کشمیر کو شورش زدہ بھارتی ریاست قرار دینے کا سخت نوٹس لیا اور وزارت داخلہ سے وضاحت طلب کی جس پر سیکریٹری داخلہ نے کمیٹی کے روبرو پیش ہو کر معذرت کی۔ ان کا کہنا تھا کہ بیان عجلت میں لکھا گیا تھا۔ انہوں نے ترمیم شدہ نوٹ کی کاپی کشمیر کمیٹی میں بھی پیش کی۔ کمیٹی نے تمام وزارتوں کو ہدایت کی ہے کہ کشمیر یا خارجہ پالیسی سے متعلق کوئی بھی بیان وزارت خارجہ کی ہدایت کے بغیر شائع نہ کیا جائے۔

امریکی وزیر دفاع لیون پنیٹا نے کہا ہے کہ دو ہزار چودہ کے بعد افغانستان میں تعینات رکھے جانے والے فوجیوں کی تعداد کے بارے حتمی فیصلہ آئندہ چند ہفتوں میں کر لیا جائے گا۔ آسٹریلیا جاتے ہوئے اپنے فوجی طیارے میں صحافیوں سے بات چیت میں انہوں نے کہا کہ افغانستان میں نیٹو کے سینئر ترین کمانڈر امریکی جنرل جان ایلن نے اس حوالہ سے اپنی تجاویز دی ہیں جن کا امریکی محکمہ دفاع اور انتظامیہ دونوں جائزہ لے رہے ہیں۔ امریکی وزیر دفاع نے مزید بتایا کہ افغانستان میں دو ہزار چودہ کے بعد انسداد دہشت گردی، سیکورٹی فورسز کی تربیت اور افغان حکومت کو مشاورت کی فراہمی کے حوالے سے بھی مختلف آپشنز زیر غور ہیں اور ان کا محتاط انداز میں جائزہ لیا جا رہا ہے۔

ڈھاکا ٹیسٹ کے پہلے روز کیرن پاﺅل اور شیونارائن چندرپال کی شاندار سنچریوں کی بدولت ویسٹ انڈیز نے بنگلہ دیش کیخلاف چار وکٹوں کے نقصان پر361 رنز بنالئے ہیں،ڈھاکا میں کھیلے جانے والے پہلے ٹیسٹ کا ٹاس ویسٹ انڈین کپتان نے جیت کر پہلے بیٹنگ کو ترجیح دی۔ کرس گیل نے جارحانہ اندز میں آغاز کیا اور2 چھکوں اور دو چوکوں کی مدد سے 17 گیندوں پر 24 رنز بنا کر آﺅٹ ہوگئے،کیرن پاﺅل نے شاندار سنچری اسکور کرتے ہوئے ویسٹ انڈیز کا اسکور 231 رنز تک پہنچایا،وہ 117 رنز بنا کر پویلین لوٹے،جس کے بعدشیونارائن چندرپال نے سنچری اسکورکرتے ہوئے ویسٹ انڈیز کی پوزیشن مزید مستحکم کی ،پہلے روز کا کھیل جب ختم ہوا تو مہمان ٹیم نے چار وکٹوں کے نقصان پر 361 رنز بنالئے تھے ،چندرپال 123 جبکہ دنیش رام دین 52 رنز کے ساتھ کریز پر موجود ہیں۔

محکمہ موسمیات نے آئندہ چوبیس گھنٹے کے دوران ملک کے بیشترعلاقوں میں موسم خشک رہنے کی پیشگوئی کی ہے تاہم رات اور صبح کے وقت پنجاب کے وسطی اور جنوبی علاقوں میں دھند چھائے رہنے کا امکان ہے۔ آج سب سے کم درجہ حرارت سکردومیں منفی 08 ڈگری سینٹی گریڈ ریکارڈ کیا گیا۔جبکہ ملک کے دیگر شہروں مےں زےادہ سے زےادہ اور کم سے کم درجہ حرارت کچھ اس طرح رہا۔اسلام آباد25اور09، لاہور26اور13، کراچی34 اور21، پشاور25اور10، کوئٹہ22اور00، مظفرآباد25اور07، ساہیوال31اور15، سرگودھا32اور17 بہاولنگر32اور19،فیصل آباد26 اور13 جبکہ ڈیرہ اسما عیل خان میںمیںزیادہ سے زیادہ 32اورکم سے کم16ڈگری سینٹی گریڈرہا۔