PPI NEWS Bulletin 1100پی پی آئی نیوزبلیٹن

ہیڈ لائنز:۔

غداری کیس،مشرف کے ناقابل ضمانت وارنٹ گرفتاری کی استدعا
پرویز مشرف کی گزرگاہ سے 5 کلوگرام وزنی بم برآمد
واہگہ بارڈر پر پاک بھارت ڈی جی ایم اوز کی ملاقات آج ہورہی ہے
کراچی کوئٹہ ، کوہاٹ، ہنگو اور ڈی آئی خان میں موبائل فون سروس بند
اور
شام، فورسز کی بمباری جاری،8روز میں300افراد جاںبحق

خبروں کی تفصیل:۔

پرویز مشرف کے غداری کیس میں خصوصی عدالت میں پیش نہ ہونے پر سماعت کچھ دیر کے لیے ملتوی کر دی گئی۔سرکاری وکیل نے پرویز مشرف کے ناقابل ضمانت وارنٹ گرفتاری کی استدعا کر دی۔ پرویز مشرف کے وکلاءکا کہنا ہے کہ ان کی جان کو شدید خطرہ ہے اس لیے پیش نہیں ہوئے۔ پرویز مشرف کیخلاف غداری کیس کی سماعت جسٹس فیصل عرب کی سربراہی میں تین رکنی بنچ نے کی۔ پرویز مشرف کے پیش نہ ہونے پر سماعت ساڑھے9 بجے شروع ہوئی تو سرکاری وکیل نے پرویز مشرف کے ناقابل ضمانت وارنٹ گرفتاری جاری کرنے کی استدعا کر دی۔ پرویزمشرف کے وکیل انور منصور خان نے کہا کہ ابھی ہمیں پتہ چلا ہے کی پرویز مشرف کی جان کو شدید خطرہ ہے ،اس لیے وہ پیش نہیں ہوئے۔

سابق صدر جنرل ریٹائرڈ پرویز مشرف کی گزرگاہ سے 5 کلو گرام وزنی بم برآمد ہوا ہے،سابق صدر کو اسی راستے سے گزر کر عدالت جانا تھا۔رینجرز حکام کے مطابق نیشنل انسٹی ٹیوٹ آف ہیلتھ کے قریب سڑک کنارے ایک بیگ سے 5 کلو گرام وزنی بم برآمد کیا گیا ہے، بم کے ساتھ دو پستول بھی بیگ میں موجود تھے۔بم ڈسپوزل اسکواڈنے موقع پر پہنچ کر بم کو قبضے میں لے لیا۔ واضح رہے کہ پرویز مشرف کو آج خصوصی عدالت میں پیشی کے لیے اسی راستے سے گزرنا تھا۔

واہگہ بارڈر پر پاک بھارت ڈی جی ایم اوز کی ملاقات آج ہورہی گی جس میں کنٹرول لائن اور ورکنگ باو¿نڈری کے حالات پربات چیت کی جائے گی۔ ڈی جی ایم اوز کی ملاقات واہگہ بارڈر پر دن گیارہ بجے ہوگی جس میں پاکستان کی طرف سے میجرجنرل عامر ریاض شریک ہوں گے جبکہ بھارت کی نمائندگی لیفٹیننٹ جنرل ونود بھاٹیا کریں گے۔ دونوں ڈی جی ایم اوز کی معاونت چار چار افسران کریں گے۔امید کی جارہی ہے کہ ملاقات کے بعد لائن آف کنٹرول، ورکنگ باونڈری پرکشیدگی میں کمی آئے گی۔

کوئٹہ ، کوہاٹ، ہنگو اور ڈی آئی خان میں موبائل فون سروس رات دس بجے تک کیلئے بند کردی گئی ہے۔لاہور میں موبائل فون سروس گیارہ بجے بحال ہوگی۔۔حضر ت امام حسین کے چہلم کے موقع پر آج ملک کے 22 شہروں میں موبائل فون سروس بند رہے گی۔کوئٹہ میں موبائل فون سروس صبح سات بجے سے رات آٹھ بجے تک بند کی گئی ہے، جبکہ کراچی میں یہ سروس صبح 7 بجے سے رات 10 بجے تک معطل رہے گی۔

شام کے شہر حلب میں سرکاری فوج کے جنگی طیاروں کی 8 روزہ بمباری میں 87 بچوں سمیت ہلاکتیں 300 سے زائد ہوگئیں۔ذرائع کے مطابق ہلاک اور زخمی ہونے والے افراد سے اسپتال بھر گئے۔ بمباری کی ہرسطح پر مذمت کی گئی ہے۔ شام کی ایک انسانی حقوق کی تنظیم کے مطابق مرنے والوں میں 30 خواتین اور 30 باغی بھی شامل ہیں۔ اے ایف پی کے مطابق ضلع مرجا میں ایک اور حملے میں 3 بچوں سمیت مزید 5 افراد ہلاک ہوگئے۔