PPI NEWS Bulletin 0900پی پی آئی نیوزبلیٹن

ہیڈ لائنز:۔

شہدائے کربلا کے چہلم کے موقع پرملک بھرمیں سیکیورٹی ہائی الرٹ
شمالی وزیرستان آپریشن عوام کے خلاف ہے، مولانا فضل الرحمان
مشرف کی درخواستیں خارج، غداری کیس آج سے شروع
سندھ حکومت کا حیدر آباد میں بھی ٹارگٹڈ آپریشن کا اعلان
اور
بالائی شہروں میں سردی مزید بڑھنے کی پیش گوئی

خبروں کی تفصیل:۔

شہدائے کربلا کے چہلم کے موقع پرملک بھرمیں سیکیورٹی ہائی الرٹ ہے۔راولپنڈی میں فوج سمیت ساڑھے چھ ہزار سیکیورٹی اہلکار تعینات کر دیے گئے۔ مختلف شہروں میں جلوس کے راستوں پر کنٹینرز لگائے گئے ہیں اور سی سی ٹی وی کیمروں سے جلوسوں کی نگرانی کی جائے گی۔ کراچی میں شہدائے کربلا کے چہلم کے 70 سے زائد جلوس اور 290 مجالس عزا منعقد ہوں گی۔ مجالس اورجلوس کی ٹیکنیکل سویپنگ اور اسکیننگ کے بھی اقدامات کیے گئے ہیں۔ کراچی کے مرکزی جلوس کی سیکیورٹی پر 5 ہزارسے زائد پولیس اہلکار مامور کیے گئے ہیں جبکہ شہر کے حساس مقامات پر انتظامیہ کی مدد کیلئے فوج کے دستے تعینات کردیے گئے ہیں۔

جمیعت علمائے اسلام (ف) کے سربراہ مولانا فضل الرحمان نے کہا ہے کہ شمالی وزیرستان آپریشن دہشتگردوں کے نہیں بلکہ عوام کے خلاف ہے۔ آپریشن میں ایک دہشت گرد بھی نہیں مارا گیا۔ اسلام آباد میں پریس کانفرنس کرتے ہوئے مولانا فضل الرحمان کا کہنا تھا کہ شمالی وزیرستان میں دو دن سے کرفیو ہے۔ لوگوں کو کھانے پینے کی اشیاءبھی دستیاب نہیں۔ مولانا فضل الرحمان نے مزید کہا کہ سانحہ راولپنڈی بدترین المیہ ہے۔ وزیراعظم سے بات کی ہے کہ عوام کا جان و مال یقینی بنایا جائے۔ انہوں نے کہا کہ خیبر پختونخوا میں حکومت نام کی کوئی چیز نہیں، کوئی پس پردہ رہ کر حکومت کو بچانا چاہتا ہے تو یہ ممکن نہیں۔

اسلام آباد ہائیکورٹ نے سابق فوجی آمر پرویز مشرف کی طرف سے ان کیخلاف غداری کا مقدمہ چلانے کیلیے خصوصی عدالت کی تشکیل، اس کے ججوں اور اسپیشل پراسیکیوٹر کے طورپر اکرم شیخ کی تقرری کیخلاف دائر درخواستیں مسترد کر دیں۔دوسری جانب خصوصی عدالت پرویز مشرف کیخلاف غداری کیس کی سماعت آج سے شروع کرے گی، اسلام آباد ہائیکورٹ کے جسٹس ریاض احمد خان نے گزشتہ روز ان درخواستوں کی سماعت کی اور دلائل مکمل ہونے پر فیصلہ محفوظ کرلیا جو ایک گھنٹے بعد سنایا گیا، ایک سطر پر مشتمل فیصلے میں صرف یہی کہا گیا ہے کہ یہ درخواستیں ناقابل سماعت ہیں اس لیے مستردکی جاتی ہیں، فیصلے کی وجوہات نہیں بتائی گئیں۔

سندھ حکومت نے کراچی کے بعد حیدر آباد میں بھی ٹارگٹڈ آپریشن کا اعلان کر دیا۔ شرجیل میمن کہتے ہیں کہ عدالتی فیصلے قبول کرنے کی دعویدار ایم کیو ایم احتجاج کیوں کر رہی ہے۔ حیدر آباد میں ٹارگٹڈ آپریشن کا اعلان صوبائی وزیر اطلاعات سندھ شرجیل میمن نے کیا۔ میڈیا سے گفتگو کرتے ہوئے ان کا کہنا تھا کہ دہشتگرد اور جرائم پیشہ عناصر کراچی سے صوبے کے دیگر شہروں میں پھیل گئے ہیں۔ شہدائے کربلا کے چہلم کے بعد حیدر آباد میں کارروائیاں شروع کر دی جائیں گی۔

ملک کے مختلف علاقوں میں برفباری کے بعد سردی میں اضافہ ہوگیا ہے۔ محکمہ موسمیات کے مطابق 2 سے 3روز کے دوران بالائی شہروں میں سردی اور بڑھے گی۔گلگت، بلتستان اور بلوچستان کے شمالی علاقوں میں برفباری کے بعد ٹھنڈ بڑھ گئی ہے اور اس موسم میں گرم کپڑوں کے ساتھ ساتھ گرما گرم سوپ کی دکانوں پر بھی رش ہے۔ خیبر پختونخوا میں بھی سردی اپنے رنگ دکھا رہی ہے۔پنجاب اور سندھ میں ٹھنڈی ہوائیں چل رہی ہیں اوردرجہ حرارت میں نمایاں کمی ہوئی ہے۔محکمہ موسمیات کا کہنا ہے کہ آئندہ 24گھنٹو ں کے دوران مالا کنڈ ڈویژن اور گلگت، بلتستان میں چند مقامات پر بارش اور پہاڑوں پر برفباری کا امکان ہے۔ آج سب سے کم درجہ حرار ت پاراچنار میں منفی 11، اسکردو منفی 09 اور استور میں منفی 08 ڈگری ریکارڈ کیا گیا۔