PPI NEWS Bulletin 0800پی پی آئی نیوزنیوزبلیٹن

ہیڈ لائز:۔

بھارت اور ایران افغانستان میں مخصوص گروپ کی حمایت نہ کریں، پاکستان
وزیراعلیٰ سندھ کی زیر صدارت اجلاس،پیرول پر رہا قیدیوں کی فوری گرفتاری کا فیصلہ
حکومت طالبان سے مذاکرات میں ٹال مٹول سے کام لے رہی ہے، منورحسن
پڑوسی ملک دہشت گردی کو دوسروں کیخلاف استعمال نہ کرے،فضل الرحمان

اور

افغان سرحد پر جاسوس طیارے کا حملہ، 5افغان طالبان ہلاک، 2زخمی

خبروں کی تفصیل:۔

مشیر خارجہ سرتاج عزیز نے کہا ہے کہ کسی ہمسایہ ملک کی جانب سے افغان فوج کی تربیت اور معاشی تعاون پر پاکستان کو کوئی اعتراض نہیں۔مگر بھارت اور ایران افغانستان میں کسی مخصوص گروپ کو سپورٹ نہ کریں۔اسلام آباد میں سیفما کے زیراہتمام پاک افغان کانفرنس سے خطاب کرتے ہوئے سرتاج عزیز نے کہا کہ افغانستان کے مسئلے کا حل فوجی نہیں صرف سیاسی ہے۔شفاف اور غیرجانبدارانہ انتخابات میں ہی افغانستان کا مستقبل پوشیدہ ہے۔

وزیراعلیٰ ہاوس میں وزیراعلیٰ سندھ قائم علی شاہ کی زیر صدارت امن و امان کے سلسلے میں منعقد ہ اجلاس میں پے رول پر رہا قیدیوں کی فوری گرفتاری کا فیصلہ کیا گیا ہے۔وزیراعلیٰ ہاوس میں ہونے والے امن و امان کے اجلاس کی اندرونی کہانیکے مطابق یہ بھی فیصلہ کیا گیا کہ 400سے زائد قیدیوں کو دیگر صوبوں کی جیلوں میں منتقل کیا جائے گا،اجلاس میں تجویزپیش کی گئی کہ قیدیوں کومچھ اور میانوالی جیل منتقل کیا جا سکتا ہے۔

جماعت اسلامی کے مرکزی امیر سید منور حسن نے کہا ہے کہ حکومت طالبان کے ساتھ مذاکرات میں ٹال مٹول سے کام لے رہی ہے، وفاق نے خیبر پختونخوا اور بلوچستان حکومت کو تنہا چھوڑ دیا ہے، سرکاری اداروں کی نجکاری سے بیروزگاری بڑھے گی۔ پشاور میں میڈیا کے نمائندوں سے بات چیت کرتے ہوئے سید منور حسن نے کہا کہ نیٹو سپلائی لائن پر دھرنے سے امریکا کی جان پر بنی ہوئی ہے۔

جمعیت علماءاسلام کے سربراہ مولانا فضل الرحمان نے کہا ہے کہ دہشت گردی علاقائی نہیں خطے کا مسئلہ ہے۔ کوئی پڑوسی ملک اسے دوسروں کے خلاف استعمال نہ کرے۔مولانا فضل الرحمان نے یہ بات بھار تی ریاست شمالی اتر پردیش کے شہر دیوبند میں 2روزہ عالمی امن کانفرنس میں کہی۔جمعیت علماءاسلام کے سربراہ مولانا فضل الرحمان کا کہنا تھا کہ دہشت گردی کسی ایک جگہ کا مسئلہ نہیں ہے۔

افغان سرحدی علاقے میں دریائے کابل میں ایک کشتی پر جاسوس طیارے سے حملہ کیاگیا، حملے میں 5افغان طالبان ہلاک اور 2زخمی ہوگئے۔ فاٹا سیکریٹریٹ کے ذرائع کے مطابق جاسوس طیارے کا حملہ افغان سرحد ی علاقے کے قریب دریائے کابل میں ایک کشتی پر کیاگیا۔ جاسوس طیارے سے 2میزائل فائر کیے گئے۔ سیکیورٹی ذرائع کا کہنا ہے کہ حملے میں 5افغان طالبان ہلاک اور 2زخمی ہوگئے۔ حملے میں کشتی تباہ ہوگئی۔